Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 176 Hüküm no: 193 Orijinal metin no: [25b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kenan isimli kölenin Atanaş v. Dimitri’ye ait olduğunun sabit olması Mahrûsa-i Galata’da Sultan Bayezid mahallesinde sâkine hâmilü hâzihi’s-sifr Atanaş v. Dimitri nâm zimmî mahfil-i kazâda mahrûsa-i merkūmede bi’l-fi‘l voyvoda ve zâbit-i avâbık olan umdetü’l-emâcid ve’l-a‘yân Siyavuş Ağa b. Abdülmennân kethüdâsı ve tarafından husûs-ı âti’l-beyâna vekîl-i sâbitü’l-vekâlesi olan İsmail Bey b. Abdurrahman nâm kimesne mahzarında üzerine da‘vâ ve takrîr-i kelâm edip târih-i kitâbdan beş sene mukaddem abd-i memlûküm olup küfrü hâlinde iken ibâk eden işbu uzun boylu çatık kaşlı sarı elâ gözlü Rusiyyü’l-asl Kenan nâm mühtedîyi hâlâ voyvoda-i mûmâ-ileyh yedinde buldum taleb ederim vekîl-i mezbûrdan suâl olunup bana teslîme tenbîh olunmak matlûbumdur dedikde gıbbe’s-suâl vekîl-i mezbûr cevâbında fi’l-vâki‘ müvekkil-i mûmâ-ileyh mevsûf-ı merkūmu mukaddemâ ahz eylediğini ikrâr mezbûr Kenan müdde‘î-i merkūmun abd-i memlûkü olup mülkünde iken ibâk eylediğini inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahrûsa-i mezbûre hâricinde vâki‘ Müeyyedzâde mahallesi sükkânından Fazlı Beşe b. el-Hâc Kasım ve el-Hâc Mehmed b. Hüseyin nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-hakīka mevsûf-ı merkūm Kenan müdde‘î-i mezbûr Atanaş’ın abd-i memlûkü olup târih-i merkūmun mülkünde iken ibâk etmişdir. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra mevsûf-ı merkūm Kenan âhara bey‘ veya hibe veyâhud vücûh-i şer‘iyyeden bir vecihle mülkünden ihrâc etmediğine müdde‘î-i merkūma ityân-ı yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîlee alâ İsa -aleyhi’s-selâm- etmeğin mûcebiyle mevsûf-ı merkūm Kenan müdde‘î-i merkūma teslîme vekîl-i mezbûra tenbîh birle mâ vaka‘a bi’t-taleb ketb olundu. Hurrire fi’l-yevmi’s-sâmin‘ min Şevvâli’l-mükerrem li sene selâse ve seb‘în ve elf Şuhûdü’l-hâl: El-Hâc Mehmed b. Abdullah, Ebûbekir Beşe b. Musli, Mustafa b. Receb, Ahmed Yazıcı b. Mehmed, Mustafa b. Receb.