Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 177 Hüküm no: 194 Orijinal metin no: [25b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Meryem bt. Hasan’ın eşi Bayram Beşe’de olan terekesinden kardeşi Osman’ın kendisine ait hissesini aldığı Vilâyet-i Anadolu’da Akçaşehir kazâsına tâbi‘ Avcılar nâm karye sâkinelerinden iken bundan akdem müteveffât olan Meryem bt. Hasan nâm hâtunun verâseti zevc-i metrûkü Bayram’a ve li ebeveyn karındaşı Osman ve sulbiye kebîre kızı Şehri’ye münhasıra olduğu şer‘an zâhir ve müte‘ayyin oldukdan sonra mezbûr Osman meclis-i şer‘-i hatîr-i lâzımü’t-tevkīrde tereke-i müteveffât-ı mezbûre vâzı‘ü’l-yed olan zevci mezbûr Bayram Beşe mahzarında ikrâr ve takrîr-i kelâm edip karındaşım müteveffât-ı mezbûrenin cemî‘-i muhallefâtından zevci mezbûr Bayram Beşe yedinde olan cemî‘-i muhallefâtından bana isâbet eden hisse-i şer‘iyyem mukābelesinde mezbûr Bayram Beşe yedinden yirmi beş kıt‘a riyâlî guruş ahz ü kabz edip tereke-i müteveffât-ı mezbûre müte‘allika âmme-i da‘vâdan mezbûr Bayram Beşe’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene selâse ve seb‘în ve elf Şuhûdü’l-hâl: Şükrullah b. Mustafa, Resul b. Abdi, Hüseyin b. İsmail, Mehmed b. Ali, Osman b. Yusuf, Mehmed b. ( ), Mustafa b. Receb.