Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 178 Hüküm no: 196 Orijinal metin no: [25b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihri bt. Abdi’nin eşi Mehmed b. Abdullah’tan boşanması Vilâyet-i Anadolu’da vâki‘ Onikidîvân kazâsına tâbi‘ Durak nâm karyede sâkine Mihri bt. Abdi nâm hâtun tarafından hul‘-ı âti’l-beyânı ikrâra kabûlünü merkūma vekâletle vekîl olup Oruc b. Feyzullah ve Receb Reis b. Mehmed nâm kimesneler şehâdetleri ile mahzar-ı hasm-ı câhidde şer‘an vekâleti sâbite olan fahrü’l-müderrisîn Osman Efendi b. Abdülhalim nâm kimesne meclis-i şer‘-i hatîr-i lâzımü’t-tevkīrde sâhibü hâze’l-kitâb Mehmed b. Abdullah nâm kimesne mahzarında bi’l-vekâle ikrâr ve takrîr-i kelâm edip mezbûr Mehmed müvekkile-i mezbûre Mihri Hâtun’un zevci olup lâkin beynlerinde hüsn-i zindegâne olmamağla mezbûr Mehmed’in zimmetinde mütekarrir ve ma‘kūdun aleyh olan iki bin akçe mehr-i müeccelden ve nafaka-i iddet-i ma‘lûme ve me’ûnet-i süknâsından fâriğa olmak üzre mezbûr Mehmed ile vekâlet-i mahkiyem hasebiyle muhâla‘a-i sahîha-i şer‘iyye ile muhâla‘a edip ol dahi vech-i muharrer üzre hul‘-ı merkūmu kabûl eyledikden sonra zevciyyete müte‘allika olan âmme-i de‘âvîden her biri âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî aşer min Şevvâli’l-mükerrem li sene selâse ve seb‘în ve elf Şuhûdü’l-hâl: Muharrem Efendi b. İbrahim, Ahmed Yazıcı b. Mehmed, Bayram Beşe b. İlyas, Şaban b. Receb, Yusuf b. Hızır, Zülfikār b. İbrahim, Emrullah b. ( ) ve gayruhüm mine’l-huzzâr.