Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 180 Hüküm no: 198 Orijinal metin no: [26a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ebûbekir b. Ramazan, Hanna ve Mikel’in Kıbrıs’dan Mehmed Reis gemisine yükledikleri keçiboynuzunu İstanbul’da teslim aldıkları Tüccâr tâifesinden Ebûbekir b. Ramazan kendi tarafından asâleten ve Hanna ve Mikel nâm zimmîler taraflarından husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında el-Hâc Ali b. Şehsuvar ve Mustafa b. Ahmed nâm kimesneler şehâdetleri ile şer‘an vekâleti sâbite oldukdan sonra vekâleten mahfil-i kazâda sefîne reislerinden işbu râfi‘ü’l-kitâb Mehmed Reis b. Mustafa mahzarında bi’l-asâle ve bi’l-vekâle ikrâr ve takrîr-i kelâm edip ben ve müvekkillerim mezbûrân Hanna ve Mikel cezîre-i Kıbrıs iskelesinde reis-i mezbûrun sefînesine navul ile üç yüz otuz beş kantar harnub vaz‘ ve tahmîl edip İstanbul’a geldiğimizde reis-i merkūmun sefînesinde olan sâlifü’z-zikr harnubu ben ve müvekkilân-ı mezbûrân reis-i mezbûrun yedinden bi’t-tamâm ve’l-kemâl ahz ü kabz eyledik, min ba‘d üç yüz otuz beş kantar harnubdan reis-i mezbûrun yedinde bir nesne kalmamışdır dedikde gıbbe’t-tasdîki’ş-şer‘î mâ vaka‘a. Fî 11 Şevvâl sene 1073 Şuhûdü’l-hâl: El-Hâc Ahmed b. Receb, Mehmed b. Abdullah, Veli b. İbrahim, Mehmed b. Osman, Mehmed b. ( ).