Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 708 Hüküm no: 915 Orijinal metin no: [109a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Derviş b. Pîrî’nin, el-Hâc Kasım Efendi b. Hüseyin’den alacaklı olduğu Mahmiye-i İstanbul’da Unkapanı dâhilinde Azebler mahallesinde sâkin el-Hâc Derviş b. Pîrî nâm kimesne meclis-i şer‘-i hatîr-i lâzımü’t-tevkīrde el-Hâc Kasım Efendi b. Hüseyin nâm kimesne mahzarında üzerine da‘vâ ve takrîr-i kelâm edip merkūm el-Hâc Kasım Efendi zimmetinde cihet-i karz-ı şer‘îden yüz elli esedî guruş hakkım olup meblağ-ı mezbûru taleb ettiğimde vermede ta‘annüd eder suâl olunup alıverilmesi matlûbumdur dedikde gıbbe’s-suâl merkūm el-Hâc Kasım Efendi cevâbında bundan akdem merhûm olan Acem Ömer Efendi’nin arpalığı olan Karasu Yenicesi kazâsında merkūm el-Hâc Derviş’in akāribinden Mehmed Efendi nâm kimesne nâibi olmağla mezbûr Hacı Derviş meblağ-ı mezbûru mahsûl-i kazâdır var ammin Ömer Efendi’ye ver deyû bana verip ben dahi alıp hayâtında ammim mezbûr Ömer Efendi’ye teslîm etmişidim deyû def‘-i mezbûrunu mübeyyine beyyine taleb olundukda ityân-ı beyyineden izhâr-ı acz ile istihlâf etmeğin müdde‘î-i mezbûr el-Hâc Derviş’e meblağ-ı mezbûru merkūm el-Hâc Kasım Efendi’ye hayâtında müteveffâ-yı mezbûr Ömer Efendi’ye ver deyû teslîm ve emr etmediğine yemîn teklîf olundukda ol dahi alâ vefki’l-mes’ûl yemîn billâhi te‘âlâ ettiğinden sonra mûcebince meblağ-ı mezbûru müdde‘î-i merkūma edâya merkūm Kasım Efendi’ye tenbîh birle mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Hasan Çelebi b. Ahmed, Veli b. Mahmud, Baba Resul b. Rıdvan, Abdi [b.] Mehmed.