Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 708 Hüküm no: 916 Orijinal metin no: [109a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Foti v. Polihroni’nin, İbrahim Beşe b. Hasan’dan iplik almak ve evine harcamak için verdiğini iddia ettiği para hususundaki davada alacağını ispat edemediği Mahmiye-i İstanbul’da Kumkapı kurbunda Kürkçü Yani mahallesinde mütemekkin Foti v. Polihroni nâm zimmî dîvân-ı adâlet-ünvânda ma‘kūd meclis-i şer‘-i hatîrde mahmiye-i mezkûrda Kaliçeci Hasan mahallesinde sâkin bâ‘isü’l-kitâb İbrahim Beşe b. Hasan nâm kimesne mahzarında üzerine da‘vâ ve takrîr-i kelâm edip mezbûr İbrahim Beşe iplik bey‘ etmekle bundan akdem mezbûrdan iplik iştirâ etmek için dört def‘a altışar esedî guruşumu mezbûr İbrahim Beşe’ye def‘ ve teslîm ol dahi ahz u kabz ettiğinden sonra yine mezbûrun emriyle evine elli beş esedî guruş harc [ve] sarf etmişidim hâlâ meblağayn-i mezkûreyni merkūm İbrahim Beşe’den taleb ederim suâl olunsun dedikde gıbbe’s-suâl mezkûr İbrahim Beşe cevâbında merkūm Foti ancak emrim ile evime beş yüz akçe harc etmişdim deyip meblağ-ı mezbûr elli beş guruşun beş yüz akçesini ikrâr, meblağ-ı mezbûrun mâ‘adâsını ve iplik iştirâ etmek için def‘ eylediğini dört def‘a ellişer esedî guruşdan iki yüz guruş ahzını bi’l-külliye inkâr edicek müdde‘î-i merkūm Foti’den müdde‘âsını mübeyyine beyyine taleb olundukda ityân-ı beyyineden izhâr-ı acz edicek istihlâf etmeğin fi’l-vâki‘ müdde‘î-i merkūm Foti bundan akdem iplik iştirâ etmek için dört def‘a ellişer esedî guruşdan iki yüz esedî guruş def‘ ve teslîm [ve] yedinden ahz u kabz etmeyip üzerine redd-i zamândan bir nesne lâzım gelmediğine ve evine elli beş guruş harc ve sarf ettiğini bilmediğine merkūm İbrahim Beşe’ye yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince ikrârı mertebesi olan meblağ-ı mezbûr beş yüz akçeyi müdde‘î-i merkūma edâ ve teslîme merkūm İbrahim Beşe’ye tenbîh ve müdde‘î-i merkūm Foti bilâ-beyyine bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Emîrü’l-ümerâ’i’l-kirâm Mehmed Paşa kāimmakām-ı defterdâr, fahrü’l-emâsil ve’l-akrân Şaban Ağa b. ( ), fahrü’l-eşbâh Eyüb Ağa Kethüdâ-yı hazret-i efendi.