Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 710 Hüküm no: 918 Orijinal metin no: [109a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haçador’un kızları Neşho ile kardeşi Hefne’ye ait evin iki kardeş arasında paylaştırılması Husûs-ı âti’l-beyânın mahallinde tahrîri iltimâs [olunmağın] savb-ı şer‘-i celîlden mevlânâ Ömer Efendi b. İsmail irsâl olunup ol dahi hâssa mi‘mârlardan üstâd Mustafa Halîfe b. Ali ve üstâd Ali Halîfe [b.] Abdullah Eyyûbî ile Neşho ve Hefne bintey Haçador nâm Ermenilerin ale’l-iştirâki’s-seviy mülkleri olup mahmiye-i Kostantıniyye hısnı ebvâbından Kumkapı dâhilinde Sarrâc İshak mahallesinde vâki‘ bir tarafdan Haço Belerhin demekle ma‘rûf Ermeni mülkü ve bir tarafdan Rıdvan Halîfe kerîmesi mülkü ve bir tarafdan Maratşa nâm Ermeni veresesi mülkleri ve bir tarafdan tarîk-i âm ile mahdûd tahtânî iki kebîr oda [109b] ve bir sagīr kiler odası ve bir su kuyusu ve cüneyne ve kenîf ve havluyu müştemil menzile varıp zeyl-i rakīmde isimleri terkīm olunan müslimîn mahzarlarından akd-i meclis-i şer‘-i mübîn eyledikde merkūme Neşho’nun zevci ve tarafından husûs-ı âti’l-beyâna vekîli olduğu zâtını ma‘rifeti şer‘iyye ile ârifân olup mahmiye-i mezbûrda Çoban Çavuş mahallesi sükkânından olan Asvador Kalfa v. Agya ve Şeyh Ferhad mahallesi sükkânından kavukçu Mahseb v. Maliha? nâm zimmîler şehâdetleri ile şer‘an sâbit olan Delot v. Asvador ile mezbûre Hefne’nin kezâlik zevci tarafından husûs-ı câ’i’l-beyâna vekîli olduğu zâtını ma‘rifet-i şer‘iyye ile ârifân olan şâhidân-ı mezbûrân şehâdetleriyle şer‘an sâbit olan Vanis v. Papok nâm Ermenilerden her biri meclis-i ma‘kūd-ı mezbûrda bi’l-vekâle takrîr-i kelâm ve ta‘bîr ani’l-merâm edip menzil-i mezbûr ba‘de’l-mesâha müvekkilelerimiz beynlerinde taksîm olunmak murâdımızdır dediklerinde mi‘mârân-ı mezbûrân menzil-i mahdûd-ı mezkûrun arsasını mesâha ettiklerinde tûlen kırk altı zirâ‘ ve arzen bir başı on bir zirâ‘ sekiz parmak ve bir başı on buçuk zirâ‘ dört parmak olduğu müte‘ayyin oldukdan sonra menzil-i mesfûrun nısfı olup merkūm Haço Belerhin menzilini tarafından tahtânî bir kebîr oda ve bir sagīr kiler odası ve bir su kuyusu ve bir mikdâr cüneyne ve havlu ve müsta‘mel sokak kapısını müştemil olan iki yüz elli bir zirâ‘ iki parmak yeri müvekkile-i mezbûre Neşho’ya ve nısf-ı âharı olup mezbûr Maratşa veresesi mülkleri tarafında tahtânî bir kebîr oda ve bir mikdâr cüneyne ve havluyu müştemil olan iki yüz elli bir zirâ‘ iki parmak yeri müvekkile-i merkūme Hefne’ye tahsîs ve ta‘yîn olunup mezbûr Avanos müvekkilesine ta‘yîn olunan yerde bir sokak kapısı açıp ve bir kenîf binâ edip kârizini müvekkile-i mezbûre Neşho’ya ta‘yîn olunan yerde olan kârize ulaşdıracak olup bu vechile vekîlân-ı mezbûrân ale’t-terâzi menzil-i mezkûru iktisâm ettiklerinde her biri müvekkilesine ta‘yîn olunan yeri kabûl ve âharın müvekkilesine ta‘yîn olunan yere müte‘allika da‘vâdan âharın müvekkilesini ibrâ-i âmm-ı kātı‘ü’n-nizâ‘ ile ibrâ ettiğini mevlânâ-yı mezbûr mahallinde tahrîr ba‘dehû ma‘an irsâl olunan Hasan Çelebi b. Bayram ile meclis-i şer‘-i hatîre gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Efendi [b.] Osman el-İmâm, Abdurrahman Efendi b. Mehmed el-Müezzin, Yusuf b. Abdullah, Hacı İbrahim Bey b. ( ), bıçakçı el-Hâc Veli.