Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 711 Hüküm no: 919 Orijinal metin no: [109b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa b. Süleyman’ın, ölen Mehmed Halîfe b. Mustafa’daki alacağını terekesinden talep ettiği Mahmiye-i İstanbul’da Kabasakal Sinan mahallesinde sâkin umdetü’l-emâcid ve’l-ekârim Hasan Ağa b. Süleyman meclis-i şer‘-i hatîr-i lâzımü’t-tevkīrde mahmiye-i mezkûrda Molla Hüsrev mahallesi sükkânından olup Silahdâr’da baş halîfe iken bundan akdem kasaba-i İstefe’de vefât eden Mehmed Halîfe b. Mustafa’nın sulbiye kızı Âişe nâm sagīrenin tesviye-i umûruna kıbel-i şer‘den mansûb vasîsi ve tereke-i vâfiyesine vâzı‘ü’l-yed olan Mustafa Efendi b. Ömer mahzarında da‘vâ ve takrîr-i kelâm edip merkūm Mehmed Halîfe zimmetinde bundan akdem hâl-i hayâtında yedimden müşterâ ve makbûz beynimizde ma‘lûm altı re’s deve semeninden otuz bin akçe ve zikr olunan develerin emri ile ba‘zı levâzımlarına harc eylediğim bin beş yüz akçe ve beynimizde ma‘lûm Eskişehir mukāta‘ası malından ahz ve istihlâk ettiği on beş bin akçe ki cem‘an kırk altı bin beş yüz akçe hakkım olup hattâ vech-i meşrûh üzre bana deyni olduğunu bin yetmiş altı Şevvâl evâhirinde mahrûse-i Edirne’de ikrâr dahi etmişidi kable’l-edâ vefât etmeğin hâlâ tereke-i vâfiyesinden taleb ederim vasiyy-i mezbûrdan suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahalle-i mezkûre sükkânından Arapkirli Hasan Bey b. İsmail ve Mehmed Bey b. Veli nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı merkūm Mehmed Halîfe bin yetmiş altı Şevvâli evâhirinde mahrûse-i Edirne’de hâl-i hayâtında müdde‘î-i merkūm Hasan Ağa’ya bir katar altı re’s deve semeninden otuz bin akçe ve zikr olunan develere emrim ile harc eylediği bin beş yüz akçe ve beynimizde ma‘lûm Eskişehir mukāta‘ası malından ahz ve istihlâk eylediğim on beş bin akçe ki cem‘an kırk altı bin beş yüz akçe müdde‘î-i merkūm Hasan Ağa’ya zimmetimde lâzımü’l-edâ ve vâcibü’l-kazâ deynim vardır deyû bizim huzûrumuzda ikrâr ve bizi işhâd eyledi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle oldukdan sonra meblağ-ı mezbûr kırk altı bin beş yüz akçeyi küllen ve ba‘zen ahz ve istîfâ veya hibe turûk-ı şer‘îden bir tarîk ile müteveffâ-yı mezbûrun zimmetini ibrâ etmediğine müdde‘î-i merkūma yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince meblağ-ı mezbûru tereke-i müteveffâ-yı mezbûrdan edâ ve teslîme vasiyy-i mezbûra tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ aşer min Ramazâni’l-mübârek li sene seb‘a ve seb‘în ve elf. Şuhûdü’l-hâl: İbrahim Çelebi b. Mehmed, Hüseyin Çelebi b. Ahmed, Mehmed Çelebi b. Ramazan, Resul b. Rıdvan.