Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 712 Hüküm no: 921 Orijinal metin no: [110a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Naib Ömer Efendi’nin haksız yere el-Hâc Mustafa b. Murad’dan aldığı cerimeyi geri ödemesi Vilâyet-i Anadolu’da Sultanhisarı kazâsına tâbi‘ Uzunlar nâm karye ahâlîsinden bâ‘isü’l-kitâb el-Hâc Mustafa b. Murad nâm kimesne meclis-i şer‘de sâbıkan kazâ-i mezbûrda nâib olan Ömer Efendi b. Mustafa nâm kimesne mahzarında üzerine da‘vâ ve takrîr-i kelâm edip mezbûr Ömer Efendi kazâ-i mezbûrda nâib iken evine nâ-mahrem âdem girmiş deyû cerîme nâmında bi gayrı hakkın üç yüz altı tümenimi almışdır suâl olunup alıverilmek matlûbumdur dedikde, karye-i mezbûre ahâlîsinden Hasan b. Osman ve kazâ-i mezbûra tâbi‘ Eceköy nâm karyeden Musli b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Ömer Efendi kazâ-i mezbûrda nâib iken müdde‘î-i mezbûrun vech-i muharrer üzre bi gayrı hakkın üç yüz altı tümenimi ahz u kabz etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince meblağ-ı mezbûru müdde‘î-i mezbûra edâya merkūm Ömer Efendi’ye tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Baba Resul b. Rıdvan, Hasan Çelebi b. Ahmed, Veli b. Mahmud.