Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 713 Hüküm no: 922 Orijinal metin no: [110a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ahmed’in, Sâliha Hatun bt. Yusuf’a rehin olarak verildiği mücevherlerin Fâtıma’nın izni olmadan Hacı Yusuf’a satıldığı, satışın geçersiz olması sebebiyle mücevherlerin veya kıymetinin sahibine iade edilmesi Mahmiye-i İstanbul’da Aksaray kurbunda Camcı Ali mahallesi sâkinelerinden bâ‘isetü’l-kitâb Fâtıma bt. Ahmed nâm hâtun dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i âlîde el-Hâc Yusuf b. Abdullah mahzarında üzerine da‘vâ ve takrîr-i kelâm edip mahmiye-i mezbûrda Koruk Mahmud mahallesi sâkinelerinden hâzıre bi’l-meclis Sâliha Hâtun bt. Yusuf bundan akdem bana rehne cevâhir ister eğer cevâhirin var ise bana ver göstereyim demekle, ben dahi üçer ayaklı üç la‘l ve birer yâkut taşlı bir çift altın küpe ve yedişer bafteli yirmi bir yâkut ve yirmi bir elmas ile müzeyyen bir çift bilezik ve iki elmas yüzük ve yüz Hürmüz incimi var ol kimesneye göster eğer beğenir ise sonra pazar ederiz deyû her birini mezbûre Sâliha’ya teslîm edip mezbûre Sâliha dahi vech-i muharrer üzre kabz ve tesellüm ettiğinden sonra bey‘a vekîli değil iken eşyâ-i mezbûremi fuzûlen Düğmeci mahallesi sükkânından işbu Âişe bt. Ömer nâm hâtun yediyle mezbûr Hacı Yusuf’a iki yüz elli esedî guruşa bey‘ ve teslîm ol dahi iştirâ ve tesellüm edip ba‘dehû ben bey‘-i mezbûru istimâ‘ ettiğimde mücîze olmamağla suâl olunup eşyâ-i mezbûrenin a‘yânı mevcûde ise a‘yânını bana teslîme müstehlek ise mecmû‘unun kıymet-i şer‘iyyesi olan sekiz yüz esedî [guruşu] bana zâmin olmak üzre mezbûr Hacı Yusuf’a tenbîh olunmak matlûbumdur dedikde gıbbe’s-suâl mezbûr Hacı Yusuf cevâbında müdde‘iyye-i mezbûre eşyâ-i mezbûresini semen-i mezbûra bey‘a tarafından mezbûre Sâliha’yı vekîl edip mezbûre Sâliha dahi vech-i muharrer üzre vekâleten semen-i mezbûra bana bey‘ ve teslîm ve kabz-ı semen etmişidi deyû def‘le mukābele edicek gıbbe’s-suâl ve’l-inkâr mezbûr Hacı Yusuf’dan def‘-i mezbûresini mübeyyine beyyine taleb olundukda ityân-ı beyyineden izhâr-ı acz ile istihlâf etmeğin müdde‘iyye-i mezbûreye eşyâ-i mezbûresini semen-i mezbûra bey‘a tarafından mezbûre Sâliha’yı vekîl etmeyip ve bey‘-i mezbûru istimâ‘ ettikde mücîze olmadığına yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince eşyâ-i mezbûre mevcûd ise a‘yânını müdde‘iyye-i mezbûreye teslîme müstehlek ise ba‘de’s-sübût kıymet-i şer‘iyyelerini müdde‘iyye-i mezbûreye zâmin olmak üzre merkūm el-Hâc Yusuf’a tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Umdetü erbâbi’t-tahrîr ve’l-kalem Ebûbekir Efendi Tezkireci-i evvel, umdetü erbâbi’t-tahrîr ve’l-kalem Mustafa Efendi Tezkireci-i sânî, umdetü’l-emâsil ve’l-a‘yân İsmail Ağa Serçavûşân, fahrü’l-akrân Eyüb Ağa Kethüdâ-yı hazret-i efendi.