Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 64 Hüküm no: 25 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Beşe’nin bağ, bahçe ve tarlalarını İbrahim Bey’e sattığı Vilâyet-i Anadolu’da Zağferanborlu’suna tâbi‘ Bulak köyü nâm karye ahâlîsinden Halil Beşe b. İbrahim mahfil-i şer‘-i hatîr-i lâzımü’t-tevkīrde işbu bâ‘isü’l-kitâb İbrahim Bey b. Mustafa nâm ceddi muvâcehesinde bi’t-tav‘i’s-sâf ikrâr [ve] i‘tirâf [edip] karye-i mersûmede vâki‘ bir tarafdan el-Hâc Abdülfettâh mülkü ve bir tarafdan Şa‘ban Çavuş mülkü ve bir tarafdan Hüsam b. Ali mülkü ve bir tarafdan tarîk-i hâs ile mahdûd iki bâb fevkānî beyti ve çift ve harman yerini ve samanlığı hâvî menzilde olan hisse-i şâyi‘i ve karye-i mezbûre sınırı dâhilinde Yakacık nâm mevzi‘de vâki‘ lede’l-ahâlî ve’l-cîrân ma‘lûmü’l-hudûd olan bir kıt‘a bağda olan hisse-i şâyi‘imi ve yine karye-i mezbûre sınırı dâhilinde beyne’l-cîrân ma‘lûmü’l-hudûd olup ve mülk mevzi‘de vâki‘ bir kıt‘a bağçede olan hisse-i şâyi‘imi ve yine karye-i mezbûre sınırında Güllü nâm mevzi‘de vâki‘ bir kıt‘a bağda olan hisse-i şâyi‘imi mezbûr İbrahim Bey’e bey‘-i bâtt-ı sahîh-i şer‘î ile bin akçeye bey‘ edip ol dahi iştirâ ve kabûl eyleyip ve yine karye-i mezbûre sınırı dâhilinde vâki‘ inde’l-ahâlî ve’l-cîrân ma‘lûmü’l-hudûd olup yedi kıt‘a tarlada olan hisse-i şâyi‘imi mezbûr İbrahim Bey’e ma‘rifet-i sâhib-i arzla iki bin akçe bedel mukābelesinde ferağ ve tefvîz ol dahi tefevvüz ve kabûl eyledikden sonra semen-i mersûm bin akçe ile bedel-i merkūm iki bin akçe ki cem‘an üç bin akçeyi mezbûr İbrahim Bey yedinden bi’t-tamam ahz u kabz edip ve mersûm bağların tasarrufuna taslît eyledim dedikde kayd şüd. Fî-21 Receb fi’t-târîhi’l-mezbûr. Şuhûdü’l-hâl: Osman Bey b. Mustafa, Hüseyin Bey el-cündî, Mehmed Bey el-cündî, Süleyman Çelebi b. Abbas Bey ve gayruhum mine’l-huzzâr.