Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 65 Hüküm no: 26 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tenbel Nasuh adlı kişinin sağ olduğunun anlaşıldığı Dergâh-ı âlî yeniçerilerinden doksan beşinci deveciler odasında odabaşı olan Ali Beşe b. Abdullah mahfil-i şer‘-i şerîfde medîne-i Üsküdar kazâsına tâbi‘ Akâbad nâhiyesinde mahmiye-i İstanbul’da merhûm Ahi Çelebi Câmi‘-i şerîfi Evkāfı’ndan Doğan Dede Çiftliği nâm karye ahâlîsinden bâ‘isû’l-kitâb Şeyh Hüseyin Efendi b. Rüstem ve Mehmed Efendi Abdülbâki ve Ahmed Bey b. Abdullah ve Mehmed Efendi b. Ya‘kub ve Hüseyin b. el-Hâc Mehmed ve Şa‘ban b. Ali ve İvaz b. Abdülbâki ve Mustafa b. Abdülcelil ve Habib Sofu b. Emirhan ve Mustafa Beşe b. Ali ve Halil Bey b. Mehmed ve diğer Halil Bey b. Pir Veli ve Seyfi b. İsa Bali ve Ahmed Efendi b. İlyas ve Bayram Beşe b. Şa‘ban nâm kimesneler ve sâirleri mahzarlarında ikrâr-ı tâm ve takrîr-i kelâm edip bundan akdem medîne-i mezbûre nâhiyelerinden Taşköprü nâhiyesi ahâlîsinden Nasuh b. Abdullah nâm şakī âlet-i harble nısfü’l-leylde karye-i mezbûrede İbrahim [b.] Ramazan nâm kimesnenin menziline girip emvâl ve erzâkın nehb ü gāret edip ve yine karye-i mezbûrede Ali Reis nâm kimesnenin dahi menziline girip ba‘zı eşyâ sirka eyledikden sonra yine karye-i mezbûrede Kıbtiyân tâifesi sâkinler oldukları mahalle müretteb [varıp] mezbûru ahz eylemek murâd eylediklerinde ceng etmeğe mübâşeret eyleyip âlet-i harble hücûm ve tüfenk atıp tarafeynden harb ü darb sadedinde mezbûr Nasuh katl olunup benim dahi Tenbel Nasuh nâmında bir yoldaşım ol cânibde sâkin olup ve bilâ-vech katl olunmuşdur zu‘muyla veresesi tarafından vekâleten ve yoldaşım olmağla karye-i mezbûre ahâlîsi olan mezbûrlardan kātîl-i mezbûrun dem ü diyetini da‘vâ eylemiş idim. Hâlâ yoldaşım olan mezbûr Tenbel Nasuh sağ ve sâlim ve sıhhat üzere olmağla zikr olunan da‘vâ ve mutâlebeden ve eymân ve muhâsamadan mezbûrların zimmetlerini ibrâ ve ıskāt eyledim, da‘vâ dahi edersem lede’l-hükkâmi’l-kirâm istimâ‘ ve ısgā olunmasın dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-şehri Recebi’l-mürecceb li-sene selâse ve sittin ve elf. Şuhûdü’l-hâl: Hasan Çelebi b. Hüseyin, Ahmed Çelebi b. Mehmed, Mehmed Beşe b. Abdullah, Mehmed Beşe b. Ali, Keresteci el-Hâc Abdi b. Hüseyin, Keresteci Fazlı Beşe.