Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 717 Hüküm no: 926 Orijinal metin no: [110b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sabiha bt. Murad’ın evinden çalınıp Emetullah bt. Ali’de bulunan kaftanın sahibine iade edilmesi Mahmiye-i İstanbul’da Molla Hüsrev mahallesi sükkânından bâ‘isetü’l-kitâb Sabiha bt. Murad nâm hâtun meclis-i şer‘-i şerîf-i Ahmedî ve mahfil-i dîn-i münîf-i Muhammedî’de Emetullah bt. Ali nâm hâtun mahzarında üzerine da‘vâ ve takrîr-i kelâm edip mezbûre Emetullah’ın mülkü olmak üzre yedinde olan işbu alaca al sandal kaftan mülküm olup târih-i kitâbdan yirmi altı gün mukaddem mahalle-i mezbûrda vâki‘ evim açılıp iki sandık esvâbım sirkat olundukda zikr olunan kaftanım dahi zâyi‘ olmuşidi suâl olunup kasr-ı yedine ve bana teslîme tenbîh olunmak matlûbumdur dedikde gıbbe’s-suâl mezbûre Emetullah cevâbında târih-i kitâbdan üç sene mukaddem kumaşını alıp kendim için dikdirmişdim kendi mülkümdür deyip müdde‘iyye-i mezbûrenin mülkü olduğunu inkâr edicek müdde‘iyye-i mezbûreden müdde‘âsını mübeyyine beyyine taleb olundukda mahalle-i mezbûr sükkânından Receb b. Mehmed nâm kimesne ile Fâtıma bt. Mustafa ve Gevher bt. Hasan nâm hâtunlar li ecli’ş-şehâde meclis-i şer‘a hâzırân olup istişhâd olunduklarında fi’l-hakīka zikr olunan işbu alaca al sandal kaftan müdde‘iyye-i mezbûrenin yirmi altı gün mukaddem yedinde olup müllâk tasarrufu gibi tasarruf eder idi biz bu husûsa bu vech üzre şâhidleriz şehâdet [dahi] ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘iyye-i mezbûre tahlîf-i şer‘î ile tahlîf olundukdan sonra mûcebince müdde‘iyye-i mezbûrenin istihkâkına hükm olunup zikr olunan kaftanı müdde‘iyye-i mezbûreye teslîme merkūme Emetullah’a tenbîh olunmağın mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min şehri Ramazâni’l-mübârek li sene seb‘a ve seb‘în ve elf Şuhûdü’l-hâl: Mehmed Çelebi b. Abdullah, Abdi Çelebi b. Hüseyin, Bekir Çelebi b. Mustafa, İbrahim Çelebi b. Ahmed, Resul [b.] Rıdvan.