Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 718 Hüküm no: 927 Orijinal metin no: [110b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Molla Ali b. Şeyh Mehmed’in, Sâlih Efendi’den ipek ve Bursa yastığı bahasından alacaklı olduğu Medîne-i Bursa’da Molla Gürânî mahallesi ahâlîsinden olup bi tarîki’l-müsâfere mahmiye-i İstanbul’da Evliyâ Efendi odalarında sâkin bâzirgân tâifesinden bâ‘isü’l-kitâb Molla Ali b. Şeyh Mehmed nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de Sâlih Efendi b. ( ) nâm kimesne mahzarında üzerine da‘vâ ve takrîr-i kelâm edip mezbûr Sâlih Efendi zimmetinde yedimden müşterâ ve makbûz beynimizde ma‘lûm üç çift Bursa yastığı semeninden otuz esedî guruş ve ipek semeninden [111a] bâkī dört esedî guruş hakkım olduğundan mâ‘adâ medyûnum olup hâlâ mahrûse-i Edirne’de olan Hacı Mustafa nâm kimesne bana îsâl ve teslîm için mezbûr Sâlih Efendi’ye seksen sekiz esedî guruş def‘ ve teslîm edip ol dahi ahz u kabz ettiğinden sonra meblağ-ı mezbûr seksen sekiz esedî guruş fuzûlen ( ) nâm kimesneye ikrâz ve teslîm ile istihlâk edip zimmetinde deyn olmağla suâl olunup cem‘an yüz yirmi iki esedî guruş hakkımın mezbûr Sâlih Efendi’den alıverilmesi matlûbumdur dedikde, gıbbe’s-suâl mezbûr Sâlih Efendi müdde‘î-i mezbûr yedinden müşterâ ve makbûz üç çift yastık semeninden otuz guruş ve ipek semeninden bâkī dört esedî guruş deyni ve mezbûr Hacı Mustafa’nın vech-i muharrer üzre müdde‘î-i mezbûra îsâl ve teslîm için kendiye def‘ ve teslîm edip kendi dahi kabz ettiği seksen sekiz esedî guruşu fuzûlen mezbûr iktirâz ve tesellüm etmekle istihlâk edip zimmetinde deyn olduğunu ikrâr etmeğin mûcebince meblağ-ı mezbûr yirmi iki esedî guruşu müdde‘î-i mezbûra edâya merkūm Sâlih Efendi’ye tenbîh olunmağın mâ hüve’l-vâki‘ bi’t-taleb ketb olundu. Fî yevmi’s-sânî ve’l-ışrîn min şehri Ramazâni’l-mübârek li sene seb‘a ve seb‘în ve elf Şuhûdü’l-hâl: El-Hâc Hüseyin b. el-Hâc Veli, Mehmed Çelebi b. Abdülmennân, Hasan Çelebi b. Ahmed, İbrahim Çelebi b. Ahmed.