Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 283 Hüküm no: 352 Orijinal metin no: [49b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayni Hâtun bt. Abdullah’ın boşandığı eşi Mehmed Reis’de olan alacağını havale suretiyle Ali Beşe’den tahsil ettiği Mahrûsa-i Galata’da Alacamescid mahallesinde sâkin Aynî Hâtun bt. Abdullah meclis-i şer‘-i hatîr-i lâzımü’t-tevkīrde mahmiye-i İstanbul’da Yemiş iskelesi’nde sâkin hâfız hâze’l-kitâb Ketenci Ali Beşe b. Abdünnebi nâm kimesne tarafından ikrâr-ı âti’l-beyânı tasdîka vekîl olup bimâ hüve nehcü’s-sübût şer‘an vekâleti sâbite olan üstâd Ali b. Hüseyin nâm hayyât mahzarında bi tav‘ihâ ikrâr ve takrîr-i kelâm edip bundan [akdem] zevc-i mutallıkım olan gāib ani’l-meclis Mehmed Reis nâm kimesne zevcim iken nafaka-i mefrûzamdan ba‘de külli hesâb zimmetinde olan üç bin akçe hakkım müvekkil-i mezbûr Ali Beşe’ye devr-i şer‘î olunmuşidi el-hâletü hâzihî meblağ-ı mezbûru merkūm üç bin akçeden mezbûr Ali Beşe zimmetinde bir akçe ve bir habbe hakkım bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâbi‘ aşer min Zilka‘deti’ş-şerîfe li sene selâse seb‘în ve elf. Şuhûdü’l-hâl: El-Hâc Kenan b. Abdullah, el-Hâc Sefer b. Fazlullah, el-Hâc Ramazan b. Ahmed, Ebûbekir Beşe b. Şaban Çukadâr, Mustafa Çelebi b. Receb ve gayruhüm.