Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 719 Hüküm no: 929 Orijinal metin no: [111a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. İbrahim’in, Şeyh Ahmed Efendi’ye evini bey‘ bi’listiğlâl yoluyla sattığı Mahmiye-i İstanbul’da Emin Bey mahallesinde sâkin Mühürdâr demekle ma‘rûf Mehmed Ağa b. İbrahim meclis-i şer‘-i hatîrde merhûm Şeyh İsmail Efendi’nin oğlu ve nukūd-ı mev[kū]fesine mütevellî olan umdetü’l-vâ‘izîn zübdetü’n-nâsihîn eş-Şeyh Ahmed Efendi tarafından husûs-ı âti’l-beyâna vekîl olup bimâ hüve nehcü’s-sübût şer‘an vekâleti sâbite olan li ebeveyn karındaşı Sunullah Efendi mahzarında ikrâr ve takrîr-i kelâm edip Havâss-ı Refî‘a mahallâtından Defterdâr câmi‘i kurbunda Çömlekçi mahallesinde vâki‘ bir tarafdan Ayasofya vakfı ve üç tarafdan tarîk-i âm ile mahdûd dâhilen ve hâricen büyût-ı adîde ve cüneyneyi müştemil mülk menzilimi cümle hukūk ve merâfıkı ile mütevellî-i mûmâ-ileyh eş-Şeyh Ahmed Efendi’ye yedi yüz esedî guruşa bi tarîki’l-istiğlâl bey‘ ve teslîm ol dahi mâl-ı vakf-ı mezbûr ile vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûru mûmâ-ileyh Şeyh Ahmed Efendi yedinden tamâmen ahz u kabz edip yine menzil-i mahdûd-ı merkūmu mûmâ-ileyh eş-Şeyh Ahmed Efendi ba‘de’t-tahliyyeti’ş-şer‘iyye târih-i kitâbdan üç yüz altmış gün tamâmına değin yüz beş esedî guruşa bana îcâr ve teslîm ben dahi vech-i meşrûh üzre istîcâr ve kabûl eyledim dedikde gıbbe’t-tasdîk merkūm Mehmed Ağa meclis-i mezbûrda i‘âde-i kelâm edip eğer müddet-i mezbûr tamâmında semen-i mezbûr ile ücret-i mezkûreyi mütevellî-i mûmâ-ileyhe edâ eylemez isem menzil-i mahdûd-ı mezbûru semen-i misli ile âhara bey‘ ve semeninden semen-i mezbûr ile ücret-i mezkûreyi mütevellî-i mûmâ-ileyhe edâ ve teslîm ve fazla kalırsa bana îsâle ve ahz ve îsâl[in] mütevakkıf olduğu umûrun küllîsine tarafeynden işbu hâzır bi’l-meclis el-Hâc Receb b. Fazlullah’ı azl ve in‘izâlden masûne vekâlet-i devriye ile vekîl nasb ve ta‘yîn eyledim dedikde ol dahi vekâlet-i mezkûreyi kabûl ve merâsimini edâya ta‘ahhüd etmeğin mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Umdetü havâssi’l-mukarrebîn Ahmed Ağa-yı Saray-ı cedîd, Ali Ağa Kethüdâ-yı Saray-ı cedîd, Mehmed Çavuş b. İbrahim, Osman Bey Helvacı, Zülüflü İsmail Bey.