Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 720 Hüküm no: 930 Orijinal metin no: [111a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mühtedi İsmail Beşe’nin kardeşi Kiragos’taki alacak davasında sulh olduğu Dergâh-ı âlî -dâme merci‘an li’l-e‘âlî- yeniçerilerinin yetmiş dördüncü cemâ‘atine mahsûs oda ahâlîsinden İsmail Beşe b. Abdullah nâm mühtedî meclis-i şer‘-i hatîrde li ebeveyn karındaşı işbu bâ‘isü’s-sifr Kiragos v. ( ) nâm Ermeni muvâcehesinde ikrâr ve takrîr-i kelâm edip ba‘dehû şeref-i İslâm’la müşerref olmazdan mukaddem vâlidemiz Meryem nâm Ermeniye hâlike oldukda mezbûr Kiragos hâlike-i mezbûrenin techîz ve tekfînine kendi malından harc ve sarf eylediği elli kıt‘a riyâlî guruşu teberru‘ etmişken bi gayrı vech-i şer‘î zikr olunan techîz için yirmi kıt‘a riyâlî guruşumu ahz u kabz eylemişidi, hâlâ meblağ-ı mezbûr yirmi riyâlî guruşu karındaşım mezbûr Kiragos’dan da‘vâ ve taleb eylediğimde beynimizde münâza‘ât-ı kesîre ve muhâsamât-ı şedîde vakı‘a olmuşidi el-hâletü hâzihî tavassut-ı muslihîn ile meblağ-ı mezbûr da‘vâsından mezbûr Kiragos benimle sekiz kıt‘a esedî guruş üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr sekiz kıt‘a esedî guruşu meclis-i şer‘le mezbûr Kiragos yedinden tamâmen ahz u kabz edip husûs-ı mezbûra müte‘allika da‘vâdan mersûm Kiragos’un zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Şaban Beşe [b.] İbrahim, Mehmed Beşe b. Abdülkādir, es-Seyyid Süleyman Efendi [b.] es-Seyyid Ali, Mehmed Efendi el-Kadı.