Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 284 Hüküm no: 353 Orijinal metin no: [49b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Abdullah’ın bazı eşyalarını azat ettiği cariyesi Âişe’yi hibe ettiği Mahmiye-i Galata’da el-Hâc A‘mâ mahallesi sâkinelerinden Âişe bt. Abdullah nâm hâtun tarafından husûs-ı âti’l-beyânı ikrâra vekîl olup hasm-ı şer‘î-i câhid mahzarında mezbûreyi ma‘rifet-i şer‘iyye ile ârifân olan üstâd Ahmed b. Hüseyin ve Muzaffer Bey b. Abdullah şehâdetleri ile şer‘an vekâleti sâbite olan fahrü’l-eimme Musa Efendi b. Mehmed meclis-i şer‘-i şerîf-i lâzımü’t-tevkīrde müvekkile-i mezbûrenin câriye-i mu‘takası olan işbu râfi‘atü’l-kitâb Âişe bt. Abdullah tarafından husûs-ı âti’l-beyânı tasdîka vekîl olup mezbûreyi kezâlik ma‘rifet-i şer‘iyye ile ârifân olan üstâd Ahmed b. Hüseyin ve Osman b. Hüseyin nâm kimesneler şehâdetleri ile şer‘an vekâleti sâbite olan Mustafa Bey b. Abdullah muvâcehesinde bi’l-vekâle ikrâr ve takrîr-i kelâm edip müvekkilem mezbûre Âişe Hâtun’un silk-i mülkünde münselik olan eşyâsından iki döşek ve üç minder ve beş yorgan ve dört kilim ve bir yan keçesi ve altı çarşaf ve nakid üç bin akçe ve on beş sahan ve altı tencere ve bir leğen ve bir ibrik ve bir tepsi ve üç velense ve sâir esâs-ı beyt ve menkūlât kısmından ism-i mâl ıtlâk olunur cümle eşyâsını hibe ve teslîm ve temlîk edip müvekkile-i mezbûre Âişe Hâtun dahi vech-i muharrer üzre eşyâ-i mezkûreyi meclis-i hibede ittihâb ve kabz ve kabûl eyledi ba‘de’l-yevm eşyâ-i mezkûre müvekkile-i mezbûrenin mülk-i mevhûbesidir. Müvekkile-i mezbûre Âişe’nin aslâ alâka ve medhali kalmamışdır, keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâdis aşer min Zilka‘deti’ş-şerîfe selâse ve seb‘în ve elf. Şuhûdü’l-hâl: Mustafa Bey b. Mehmed, el-Hâc Yahya b. Mehmed, Nasuh b. Yusuf, Abdülkerim.