Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 285 Hüküm no: 354 Orijinal metin no: [50a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Pandeli’nin, Yani v. Nikola aleyhindeki darb şiddet davasında haklı olduğu Mahmiye-i Galata müzâfâtından Yeniköy nâm karye rüesâsından Hürmüz Reis’in sefînesinde mellâh tâifesinden olan işbu râfi‘ü’s-sifr Nikola v. Pandeli nâm zimmî mahfil-i kazâda yine mellâh tâifesinden Yani v. Nikola nâm zimmî muvâcehesinde üzerine da‘vâ ve takrîr-i kelâm edip mezbûr Yani târih-i kitâb günü mahmiye-i mezbûre dâhilinde vâki‘ Ermeni kilisesi kurbunda olan bahçe önünde ba‘de’l-asr yumruk ve tabanca ile sırtıma ve göğsüme darb eyledi hâlâ mezbûrdan suâl olunup mûceb-i şer‘îsi icrâ olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda tâife-i nasârâdan Yanaki v. Yomtar Reis ve Kiryakoz v. Tatel ve Nikola v. Pandazi nâm zimmîler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ târih-i kitâb-ı mezkûrda zikr olunan bahçe önünde ba‘de’l-asr mezbûr Yani bi gayr-ı vech-i şer‘î yumruk ve tabanca ile müdde‘î-i mezbûr Nikola’nın sırtına ve göğsüne bizim huzûrumuzda darb eyledi. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyetihî şerâiti’l-kabûl şehâdetleri makbûle olmağın mâ vaka‘a bi’t-taleb ketb olundu. Fi’l-yevmi’s-sâmin aşer min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Ramazan Çelebi b. Mehmed, Hüseyin b. Mirza, Şaban b. Mustafa, Osman Çelebi b. ( ), Mehmed Çelebi b. Mirza ve gayruhüm.