Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 285 Hüküm no: 355 Orijinal metin no: [50a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Yazıcı b. Mehmed’in Cide kazası köylerinde olan ev, tarla ve meyve ağaçlarını Mustafa Çelebi b. Bayram’a devretmesi Mahmiye-i Galata’da Bereketzâde mahallesinde sâkin Ahmed Yazıcı b. Mehmed nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mustafa Çelebi b. Bayram nâm kimesne mahzarında ikrâr ve takrîr-i kelâm edip silk-i mülk-i sahîhimde münselik olup vilâyet-i Anadolu’da Cide kazâsı müzâfâtından Şehreni? nâhiyesinde vâki‘ inde’l-ahâlî ve’l-cîrân ma‘lûmü’l-hudûd harâbe mülk menzil ve harman yeri ve erik bahçesini ve mevâzi‘-i adîdede vâki‘ eşcâr-ı müsmire ve gayr-ı müsmireyi ve Anasra [Amasra?] nâm karyede vâki‘ kezâlik ma‘lûmü’l-hudûd mülk menzil ve harman yerini ve yine mevâzi‘-i müteferrikada vâki‘ ma‘lûmü’l-hudûd elma ve armud ve sâir eşcâr-ı müsmire ve gayr-ı müsmireyi bi safkatin vâhidetin mezbûr Mustafa Çelebi’ye iki bin fıddî ve râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ol dahi vech-i muharrer üzre iştirâ ve temellük ve kabûl edip karyeteyn-i mezbûreteynde vâki‘ babamdan intikāl-i âdî ile intikāl eden taht-ı tasarrufumda olan lede’l-ahâlî ve’l-cîrân ma‘lûmü’l-hudûd ve’l-kıt‘a tarlaların ve dağların hakk-ı tasarrufunu ma‘rifet-i sâhib-i arz ile mezbûr Mustafa Çelebi’ye dört bin akçe bedel mukābelesinde ferâğ ve tefvîz edip ol dahi ber vech-i muharrer tefevvuz ve kabûl eyledikden sonra semen-i mezkûr iki bin akçe ile bedel-i merkūm dört bin akçe ki cem‘an altı bin akçeyi yedinden tamâmen ahz ü kabz edip emlâk-i mezkûre ile mârrü’z-zikr tarla ve dağları mahallinde kabz ve tasarrufa mezbûr Mustafa Çelebi’yi taslît eyledim ba‘de’l-yevm emlâk-i mezkûre mezbûr Mustafa Çelebi’nin mülk-i müşterâsıdır ve tarla ve dağlar hakk-ı müfevvazıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis aşer min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Abdurrahman Efendi b. Mirza Hoca-i Saray-ı atîk, Mustafa Efendi b. Veli, Nasuh Efendi b. Emrullah, Mahmud Beşe b. Halil, Ali Çelebi b. Ahmed Bey ve gayruhüm.