Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 286 Hüküm no: 356 Orijinal metin no: [50a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nestola bt. Yorgi’nin Despino bt. Yorgi aleyhindeki arsa davasının reddedilmesi Mahmiye-i Galata müzâfâtından İstinye nâhiyesine tâbi‘ Tarabya nâm karye sâkinelerinden Nestula bt. Yorgi nâm nasrâniye meclis-i şer‘-i hatîr-i lâzımü’t-tevkīrde li eb kız karındaşı olup arsa-i câi’z-zikre vech-i âtî üzre vâzı‘atü’l-yed olan işbu râfi‘atü’l-vesîka Despino bt. Yorgi nâm nasrâniye muvâcehesinde üzerine da‘vâ ve takrîr-i kelâm edip karye-i mezbûrede vâki‘ bir tarafdan Serdâr Mustafa Çelebi mağazası ve bir tarafdan Yorgi nâm zimmî mülkü ve bir tarafdan sâhil-i bahr ve bir tarafdan tarîk-i âm ile mahdûd mülk bozahâne ve arsası ceddem olup bundan akdem hâlike olan Sultana nâm nasrâniyenin mülkü olup ba‘de hâlikihâ arsa-i mezkûre sadrî oğulları Panayot ve Preşkova ve sadriye kızı olup vâlidem olan İrene nâm nasrâniyeye intikāl eyledikden sonra mezbûre İrene dahi hâlike olup verâseti bana münhasıra olmağla hâlâ arsa-i mezkûreden hisse-i şer‘iyyesini ben mezbûre Despino’dan taleb ederim, suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûre Despino cevâbında fi’l-vâki‘ arsa-i mezkûre müdde‘iye-i mezbûrenin ceddesi merkūme Sultana’nın mülkü olup ba‘de helâkihâ oğulları mezbûrân Panayot ve Preşkova ile kızı merkūme İrene’ye intikāl eyledikden sonra mezbûr Panayot arsa-i mezkûrenin cümlesini mezbûre İrene’nin muvâcehesinde yirmi sene zabt ve tasarruf edip ba‘dehû mezbûr Panayot arsa-i mezkûreyi târih-i kitâbdan otuz sene mukaddem babam mezbûr Yorgi’ye on altı [50b] bin akçeye bey‘ ve teslîm babam mezbûr Yorgi dahi ba‘de’l-iştirâ arsa-i mezkûreyi mezbûre İrene muvâcehesinde yirmi seneden mütecâviz mülkiyyet üzre zabt ve tasarruf edip mezbûre İrene hâl-i hayâtında taleb ve da‘vâ etmeyip sükût eylediğine binâen arsa-i mezkûrenin cümlesi babam mezbûr Yorgi’nin mülkü oldukdan sonra babam dahi arsa-i mezkûreyi târih-i kitâbdan bir sene mukaddem bana hibe-i sahîh-i şer‘iyye ile hibe ve teslîm ben dahi ittihâb ve kabz ve tesellüm edip mülk-i mevhûbem olmuşdur deyicek gıbbe’l-istintâk müdde‘iye-i mezbûre Nestula dahi cevâbında fi’l-hakīka hâl bast olunan minvâl üzre olmuşdur deyû bi tav‘ihâ ikrâr ve i‘tirâf etmeğin lâ tentakilü’d-da‘vâ ile’l-vereseti mazmûnu üzre müdde‘iye-i mezbûreye vech-i mezkûr üzre da‘vâ intikāl etmeyip da‘vâsı meşrû‘a olmadığından mâ‘adâ emlâkda bilâ-özr-i şer‘î otuz sene mürûr eden da‘vânın bilâ-emr istimâ’ında kuzât memnû‘lar olmağın mûcebiyle müdde‘iye-i mezbûre Nestula bî-vech ta‘arruzdan men‘ birle mâ vaka‘a bi’t-taleb ketb olundu. Fi’l-yevmi’s-sâbi‘ aşer min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: El-Hâc Ali Çelebi b. Mustafa, Kenan Bey b. Abdullah, Mehmed Çavuş b. Abdullah, Süleyman Çelebi b. Hüseyin, Ebûbekir Beşe b. Şaban Çukadâr.