Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 287 Hüküm no: 357 Orijinal metin no: [50b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mevlüd b. Hacı Atiye’nin ortağı Manol v. Niko aleyhindeki alacak davasında sulh olduğu Mahmiye-i Galata’da üstübücü tâifesinden el-Hâc Mevlüd b. el-Hâc Atiye nâm kimesne meclis-i şer‘-i hatîr-i lâzımü’t-tevkīrde işbu hâmilü’s-sifr Manol v. Nikola nâm zimmî muvâcehesinde takrîr-i kelâm edip mezbûr Manol ile üstübücülük san‘atında şerîkler olup hâlâ fesh-i şirket eylediğimizde beynimizde cârî olan mu‘âmelât hesâb olunup mezbûr Manol zimmetinde on bir aylık dükkân ücretinden bin beş yüz kırk akçe hakkım zuhûr etmekle meblağ-ı mezbûru taleb eylediğimde beynimizde münâza‘ât-ı kesîre vâkı‘a olmuşidi el-hâletü hâzihî tavassut-ı muslihîn ile mezbûr Manol beni bin akçe bedel üzerine inşâ-i akd-i sulh eylediğinde ben dahi sulh-i mezbûru kabûl ve bedel-i sulh olan meblağ-ı mezbûr bin akçeyi merkūm Manol yedinden bi’t-tamâm ahz ü kabz eyledim. Târih-i mezbûra gelince husûs-ı mezbûra müte‘allika cemî‘ da‘vâdan mezbûr Manol’ün zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Mehmed Efendi b. Musa, el-Hâc Ramazan b. Mehmed, Ahmed Yazıcı b. Mehmed, Mustafa Çelebi b. Receb ve gayruhüm.