Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 287 Hüküm no: 358 Orijinal metin no: [50b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. İbrahim’in Hüseyin b. Ahmed aleyhindeki darb davasında sulh olması Mahmiye-i Galata hâricinde Bedreddin Bey mahallesinde sâkin Yusuf b. İbrahim meclis-i şer‘-i hatîr-i lâzımü’t-tevkīrde yine mahalle-i merkūmede sâkin bâ‘is-i hâze’l-kitâb Hüseyin b. Ahmed nâm kimesne muvâcehesinde bi’t-tav‘i’s-sâf ikrâr ve takrîr-i kelâm edip târih-i kitâbdan dört gün mukaddem mezbûr Hüseyin mahalle-i mezbûre kurbunda vâki‘ mekābir-i müslimîn üzerinde dut düşürürken ba‘de’l-asr bi gayr-ı vech-i şer‘î karnıma depme ile darb ve kara bere eyledi deyû mûceb-i şer‘îsini mezbûrdan taleb eylediğimde ol dahi inkâr edip ba‘de münâza‘ati’l-ekîdeti’l-kesîre vesâtat-ı muslihîn ile da‘vâ-yı mezbûrumdan merkūm Hüseyin beni bin beş yüz akçe merhem bahâ ile sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr bin beş yüz akçeyi mezbûrun yedinden ahz ü kabz eyledim ba‘de’l-yevm merkūm Hüseyin’in darbının sirâyetinden nâşî bi emrillâhi te‘âlâ vefât edersem dem [ü] diyetime müte‘allika da‘vâdan mezbûr Hüseyin’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d husûs-ı mezbûra müte‘allika vechen mine’l-vücûh da‘vâ ve husûmetim yokdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Fahrü’l-kuzât Nasuh Efendi b. Yusuf, fahrü’l-müderrisîni’l-kirâm Abdülkerim Efendi, Muhzırbaşı Eyüb Ağa, Abdülkerim Efendi el-Müezzin