Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 288 Hüküm no: 359 Orijinal metin no: [51a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Pazarcı Mehmed’in ev hissesini Fâtıma bt. Mustafa’ya hibe etmesi Mahmiye-i Galata dâhilinde vâki‘ Şehsuvar mahallesinde sâkine Emine bt. pazarcı Mehmed nâm hâtun meclis-i şer‘-i hatîr-i lâzımü’t-tevkīrde kız karındaşı kızı işbu râfi‘atü’l-vesîka Fâtıma bt. Mustafa nâm hâtun mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Sâliha Hâtun bt. ( ) mülkü ve bir tarafdan Fâtıma Hâtun bt. ( ) mülkü ve bir tarafdan Huri Hâtun bt. ( ) tasarrufunda olan vakıf menzil ve bir tarafdan tarîk-i hâs ile mahdûd iki bâb fevkānî ve bir bâb tahtânî odaları ve odunluk ve bi’r-i mâyı ve kenîfi müştemil mülk menzilin nısf-ı şâyi‘i babam olup bundan akdem vefât eden mezbûr pazarcı Mehmed’den bana ve nısf-ı şâyi‘-i âharı karındaşım Âişe nâm hâtuna irs-i şer‘le intikāl edip mülkümüz olmağla hâlâ menzil-i mahdûd-ı mezkûrdan vech-i muharrer üzre mülküm olan nısf hisse-i şâyi‘a-i merkūmemi mezbûre Fâtıma Hâtun’a on beş bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr on beş bin akçeyi mezbûre Fâtıma Hâtun’a hibe-i sahîha-i şer‘iyye ile hibe ve temlîk edip ol dahi vech-i muharrer üzre ittihâb ve temellük ve kabûl eyledi ba‘de’l-yevm menzil-i mahdûd-ı mezkûrdan mülküm olan nısf-ı şâyi‘-i merkūm mezbûre Fâtıma Hâtun’un mülk-i müşterâsıdır, keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ aşer min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Fahrü’l-kuzât Nasuh Efendi b. Yusuf, umdetü’l-kuzât Hasan Efendi b. Hüsameddin Efendi, fahrü’l-müderrisîn Abdülkerim Efendi b. Mehmed, Abdülaziz Efendi b. el-İmâm, el-Hâc Ramazan b. Mehmed, Mustafa Çelebi b. Receb, Ebûbekir Beşe b. Şaban Çukadâr, Hüseyin b. Mirza, Ömer Beşe b. Abdullah yelkenci, el-Hâc Sefer b. Fazlı, Muharrem b. Receb ve gayruhüm.