Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 289 Hüküm no: 360 Orijinal metin no: [51a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Nikola’nın Nikola v. Pandeli aleyhindeki darb davasını ispat edemediği Rüesâ tâifesinden Ayazma oğlu sefînesinde mellâh tâifesinden olan Yani v. Nikola nâm zimmî meclis-i şer‘-i hatîr-i lâzımü’t-tevkīrde yine mellâh tâifesinden işbu râfi‘ü’l-kitâb Nikola v. Pandeli nâm zimmî muvâcehesinde üzerine da‘vâ ve takrîr-i kelâm edip târih-i kitâb günü mahmiye-i Galata dâhilinde vâki‘ Ermeni kilisesi kurbunda bahçe önünde ba‘de’l-asr mezbûr Nikola yumruk ile bi gayr-ı vech-i şer‘î ağzıma darb eyledi, suâl olunup mûceb-i şer‘îsi icrâ olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ târih-i mezkûrda zikr olunan bahçe önünde yumruk ile müdde‘î-i mezbûr Yani’nin ağzına darb etmediğine yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeğin mûcebiyle müdde‘î-i mezbûr bî-vech ta‘arruzdan men‘ birle mâ vaka‘a bi’t-taleb ketb olundu. Fi’l-yevmi’s-sâmin aşer min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Ramazan Çelebi b. Mehmed, Hüseyin b. Mirza, Şaban [b.] Mustafa, Osman Çelebi b. ( ), Mahmud Çelebi b. Bayram ve gayruhüm.