Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 289 Hüküm no: 361 Orijinal metin no: [51a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa Efendi b. Hacı Mehmed’in ortağı adına Hacı İsa b. Ebü’l-Yüsr aleyhindeki alacak davasında sulh olması Mahrûsa-i Galata’da el-Hâc A‘mâ mahallesinde sâkin el-Hâc Ahmed b. Mansur nâm kimesnenin şirket-i inân vechi üzre şerîki olan fahrü’l-eimme Musa Efendi b. el-Hâc Mehmed nâm kimesne meclis-i şer‘de mahrûsa-i merkūmede Câmi‘-i Kebîr mahallesinde sâkin işbu râfi‘ü’l-kitâb el-Hâc İsa b. Ebü’l-Yüsr nâm kimesne tarafından ikrâr-ı âti’l-beyânı tasdîka vekîl olup el-Hâc Ali b. Mehmed ve Abdurrahman Kapudân b. Abdullah nâm kimesneler şehâdetleri ile şer‘an vekâleti sâbite olan Selim Çelebi b. İbrahim nâm kimesne mahzarında ikrâr ve takrîr-i kelâm edip şerîkim mezbûr el-Hâc Ahmed mukaddemâ müvekkil-i merkūm el-Hâc İsa yedine bi tarîki’l-mudârebe seksen kıt‘a esedî guruş def‘ ve teslîm, ol dahi vech-i muharrer üzre ahz u tesellüm eyledikden sonra meblağ-ı mezbûru müvekkil-i mezbûr el-Hâc İsa’dan da‘vâ ve taleb eylediğimde ol dahi zikr olunan seksen esedî guruş ahzını ikrâr edip lâkin mahrûsa-i mezbûrede Yağkapanı kurbunda vâki‘ dükkânım târih-i kitâbdan iki ay mukaddem gece ile açılıp zikri sebk eden guruş ile iştirâ eylediğim metâ‘ cümle ve cümle malım sirkat olunmuşdur demekle beynimizde münâza‘ât-ı kesîre vâkı‘a olmuşidi el-hâletü hâzihî vesâtat-ı muslihîn ile da‘vâ-yı mezkûrumdan mezbûr el-Hâc İsa beni kırk esedî guruş üzerine sulh eyledikde ben dahi sulh-i mezbûru kabûl ve bedel-i sulh olan meblağ-ı merkūm kırk esedî guruşu şerîkim olmağla müvekkil-i mezbûr el-Hâc İsa yedinden tamâmen alıp kabz eyledim ba‘de’l-yevm meblağ-ı bâkī da‘vâsından müvekkil-i mezbûr el-Hâc İsa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: İbrahim Efendi b. Receb, üstâd Ahmed b. Hüseyin, Osman b. Hüseyin, el-Hâc Mehmed b. Mehmed, Ahmed Yazıcı b. Mehmed.