Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 294 Hüküm no: 364 Orijinal metin no: [53a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şerife Meryem b. Rıdvan’ın boşandığı eşi Hasan b. Ömer aleyhindeki eşya davasını ispat edemediği Mahmiye-i Galata dâhilinde Sultan Bayezid mahallesinde sâkine Şerife Meryem Hâtun bt. Rıdvan tarafından eşyâ-i âti’z-zikri da‘vâya vekîl olup mezbûrenin zâtını ma‘rifet-i şer‘iyye ile ârifân olan es-Seyyid Mahmud Çelebi b. es-Seyyid Yusuf ve Mustafa Çelebi b. Mehmed nâm kimesneler şehâdetleri ile şer‘an vekâleti sâbite olan vâlidesi şerîfe Âişe bt. İsmail nâm hâtun mahfil-i kazâda müvekkile-i mezbûrenin zevc-i mutallıkı işbu râfi‘ü’l-kitâb Hasan b. Ömer nâm kimesne mahzarında bi’l-vekâle üzerine da‘vâ ve takrîr-i kelâm edip bundan akdem mezbûr Hasan müvekkilem mezbûre Meryem’e bir gülgûnî atlas kaftan ve bir zerdava ta‘bîr olunur kaftan ve bir turuncu zıbın ve bir al Hindî atlas şalvar ve bir kırmızı çuka terpûş ve bir mâî atlas kaftan ve bir kibritî atlas ve bir Keşmirî şal ve bir sîm ön kuşak kolanı ile zevciyyet beynlerinde kâime iken hibe ve teslîm edip ba‘de’t-tatlîk rücû‘ etmeğin zikr olunan eşyâyı ahz eylemişdir hâlâ taleb ederim suâl olunsun dedikde gıbbe’s-suâl ve akībe’l-inkâr vekîl-i mezbûre Âişe’den müdde‘âsını mübeyyine beyyine taleb olundukda ityân-ı beyyineden izhâr-ı aczile istihlâf etmeğin fi’l-hakīka zikr olunan eşyâyı müvekkile-i mezbûre Meryem’e vech-i muharrer üzre hibe ve teslîm etmediğine ve mezbûr Hasan’a yemîn teklîf olundukda ol dahi [alâ] vefki’l-mes’ûl yemîn billâhi’l-aliyyi’l-azîm etmeğin mûcebiyle mezbûr Hasan ta‘arruzdan men birle mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Kenan Bey b. Abdullah, Ramazan Efendi b. ( ), Ahmed Yazıcı b. Mehmed, Mustafa Çelebi b. Receb ve gayruhüm.