Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 295 Hüküm no: 365 Orijinal metin no: [53a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Reis b. İsa’nın Mahmud b. Mahmud’a olan borcunu ödemesi hususunda tenbihte bulunulması Mahmiye-i Galata’ya tâbi‘ kasaba-i Tophâne’de Cihangir mahallesinde sâkin işbu râfi‘ü’l-kitâb el-Hâc Mahmud b. Mahmud nâm kimesne meclis-i şer‘de sefînesinde gāriyet reisi olan Mahmud Reis b. İsa nâm kimesne mahzarında üzerine da‘vâ ve takrîr-i kelâm edip mezbûr Mahmud Reis zimmetinde cihet-i deyn-i şer‘îden bin beş yüz akçe sefîne navlundan dahi yedi yüz yetmiş beş akçe ki cem‘an iki bin iki yüz yetmiş beş akçe hakkım vardır hâlâ mezbûrdan taleb ederim, suâl olunsun dedikde gıbbe’s-suâl mezbûr Mahmud Reis cevâbında fi’l-vâki‘ müdde‘î-i mezbûr el-Hâc Mahmud’a cihet-i mezbûreden bin beş yüz akçe ve sefîne navlundan dahi yedi yüz yetmiş akçe ki cem‘an iki bin iki yüz yetmiş beş akçe zimmetimde lâzımü’l-edâ ve vâcibü’l-kazâ deynim vardır deyû bi tav‘ihî ikrâr ve i‘tirâf etmeğin mûcebiyle meblağ-ı mezbûru müdde‘î-i merkūma edâ ve teslîme mezbûr Mahmud Reis’e tenbîh birle mâ vaka‘a bi’t-taleb ketb olundu. Hurrire fi’l-yevmi’s-sâlis ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: El-Hâc Kenan Bey b. Abdullah, Ahmed Yazıcı b. Mehmed, Mehmed Beşe b. ( ), Receb Beşe b. ( ), Muharrem b. Receb