Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 295 Hüküm no: 366 Orijinal metin no: [53a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Ali Çavuş’un geçersiz olan ev alımından el-Hâc Mehmed elinde kalan bedelin mirasçılarına iadesi Mahmiye-i Galata müzâfâtından kasaba-i Kasımpaşa’da Tahtakadı mahallesi sükkânından iken bundan akdem fevt olan Ali Çavuş b. Nasuh’un verâseti kız karındaşları İsmihan ve Ümmühâni nâm hâtunlara münhasıra olduğu şer‘an zâhir ve müte‘ayyin oldukdan sonra mezbûretân taraflarından zikr-i âtî sulh ve ibrâya vekîl olup zât-ı mezbûretânı ma‘rifet-i şer‘iyye ile ârifân olan Musli Çavuş b. İbrahim ve el-Hâc Mustafa b. İsa nâm kimesneler şehâdetleriyle hasm-ı şer‘î-i câhid mahzarında şer‘an vekâleti sâbite olan Mustafa b. Nasuh nâm kimesne mahfil-i kazâda mahmiye-i mezbûrede haffâf tâifesinden işbu râfi‘ü’l-kitâb el-Hâc Mehmed mahalle-i mezbûrede vâki‘ ahâlîsi beyninde hudûdu ma‘lûm olan bir menzili mülkü olmak üzre müvekkilelerim mezbûretânın mûrisleri olan müteveffâ-yı merkūme hayâtında iken yüz kıt‘a riyâlî guruşa bâtten bey‘ ve teslîm ol dahi iştirâ ve tesellüm ve def‘-i semen-i mezkûr eyledikden sonra menzil-i merkūme müstahık zuhûr edip menzil-i merkūmu ba‘de’d-da‘vâ mûris-i merkūmun yedinden ahz ü kabz eyledikden sonra ol dahi bâyi‘-i mezbûrdan semen-i merkūma mürâca‘at etmeden fevt olup semen-i mezbûr el-Hâc Mehmed’in zimmetinde kalmağın hâlâ vekâletim hasebiyle meblağ-ı merkūmu mezbûr el-Hâc Mehmed’den taleb ve da‘vâ etmekle beynimizde münâza‘ât-ı kesîre vâkı‘a oldukdan sonra beynimizde muslihûn tavassut edip meblağ-ı mezbûrdan beni bin üç yüz akçe üzerine sulh eylediklerinde ben dahi bi’l-vekâle sulh-i mezbûru kabûl ve bedel-i sulh olan meblağ-ı mezbûr bin üç yüz akçeyi mezbûr el-Hâc Mehmed’in yedinden tamâmen alıp kabz edip mâ‘adâdan mezbûrun zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: El-Hâc İbrahim Çelebi b. Hüseyin, el-Hâc Sefer b. Halil, el-Hâc Mahmud b. Receb, Halil b. Ahmed, Mehmed Çelebi b. Mahmud, Ahmed b. Abdullah.