Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 296 Hüküm no: 367 Orijinal metin no: [53b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Baruh v. Avram’ın Andoni v. Todori’ye olan borcuna karşılık evini rehin vermesi Aragon cemâ‘atinden olup mahmiye-i Galata müzâfâtından Arnavudköy demekle ma‘rûfe karye sükkânından Baruh v. Avraham nâm yahudi mahfil-i kazâda karye-i merkūmede sâkin işbu râfi‘ü’l-kitâb Andoni v. Todori nâm zimmî muvâcehesinde ikrâr ve takrîr-i kelâm edip mezbûr Andoni yedinden on sekiz bin akçe istikrâz ve kabz edip meblağ-ı mezbûr mukābelesinde silk-i mülkümde münselik olup karye-i merkūmede vâki‘ bir tarafdan Nava v. Salamon nâm yahudi mülkü ve bir tarafdan sâhil-i bahr ve iki tarafdan tarîk-i âm ile mahdûd fevkānî ve tahtânî iki bâb odaları iki su kuyusunu ve iki kenîfi müştemil olan mülk menzilimi ba‘de’t-tahliyye ve fâriğan ani’ş-şevâgil zimmî-i mezbûrun yedine rehin vaz‘ ve teslîm, ol dahi irtihân ve kabz ve tesellüm eyledi dedikde gıbbe’t-tasdîki mâ vaka‘a bi’t-taleb ketb olundu. Fi’l-yevmi’s-sânî aşer min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Ali b. Abdullah, Dilâver Bey b. Abdullah, Mehmed b. Abdullah, Karakaşzâde Mehmed b. Mehmed, Ahmed Yazıcı b. Mehmed, Zülfikār b. İbrahim, Emrullah b. Mehmed.