Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 302 Hüküm no: 375 Orijinal metin no: [55a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Sâliha bt. Mehmed’in varislerinin terekeden hisselerini teslim aldıkları Mahmiye-i Galata müzâfâtından kasaba-i Kasımpaşa’da Sahhâf Muslihiddin mahallesinde sâkine iken bundan akdem müteveffât olan Sâliha bt. Mehmed’in verâseti zevce-i metrûkesi Ahmed b. Hüseyin’e ve vâlidesi Hanife bt. Aydın nâm hâtuna ve babası Mehmed b. Mustafa’ya münhasıra olduğu şer‘an zâhir oldukdan sonra müteveffât-ı mezbûrenin üç bin üç yüz akçeye bâliğ olan mecmû‘ muhallefâtının nısfı zevci merkūm Ahmed’e ve bâkī kalan nısfının dahi sülüsü vâlidesi merkūme Hanife’ye ve sülüsânı babası merkūm Mehmed’e intikāl ve isâbet eylediği mütehakkik oldukdan sonra mezbûrân Mehmed ve Hanife mahfil-i kazâda muhallefât-ı merkūmeye vâzı‘ü’l-yed olan zevci işbu râfi‘ü’l-kitâb merkūm Ahmed muvâcehesinde her biri ikrâr ve takrîr-i kelâm edip mûrisemiz müteveffât-ı merkūmenin muhallefâtından her birimiz hisse-i irsiyye-i ma‘lûmemizi mezbûr Ahmed yedinden bi’t-tamâm ve’l-kemâl ahz ü kabz eyledik, min ba‘d muhallefât-ı merkūmeden hisse-i irsiyyemize intikāl eden meblağdan merkūm Ahmed’in yedinde bir akçe ve bir habbe hakkımız bâkī kalmadı dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Musa Efendi b. el-Hâc Mehmed el-İmâm, Receb Efendi İmâm-ı mahalle-i mezbûre, Osman b. Hüseyin, Mustafa b. Ali ve gayruhüm.