Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 302 Hüküm no: 376 Orijinal metin no: [55a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. İstemad’ın mahzenini Kiryazi v. İstemad ve Nikola v. Yani’ye satması Mahmiye-i Galata nevâhîsinden nâhiye-i Marmara’da vâki‘ Aftun nâm karye sükkânından Dimitri v. İstemad nâm zimmî mahfil-i kazâda meyhâneci tâifesinden işbu râfi‘ü’l-kitâb Kiryazi v. İstemad ve Nikola v. Yani nâm zimmîler muvâcehelerinde ikrâr ve takrîr-i kelâm edip silk-i mülkümde münselik olup karye-i merkūmede vâki‘ bir tarafdan Angeli v. nâm zimmî mülkü ve bir tarafdan sâhil-i bahr ve iki tarafdan tarîk-i âm ile mahdûd ve mümtâz bir bâb mülk mahzenimi sekiz bin fıddî râyic fi’l-vakt akçeye iştirâk-i seviy üzre mezbûrân Kiryazi ve Nikola’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eylediklerinden sonra semeni olan meblağ-ı mezbûru merkūmân Kiryazi ve Nikola yedlerinden bi’t-tamâm alup kabz eyledim ba‘de’l-yevm mahzen-i mahdûd-ı mezkûr mezbûrânın mülk-i müşterâları olmuşdur, keyfe mâ yeşâ’ mutasarrıfân olsunlar dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: İsmail Çelebi b. Mahmud, Mehmed Bey b. Abdullah, Ali Çelebi b. Hüseyin, Receb Çelebi b. Abdullah, Mustafa b. Receb.