Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 310 Hüküm no: 388 Orijinal metin no: [57b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Loza v. Gül’ün Tomako v. Lefter aleyhindeki alacak davasının reddedildiği Mahmiye-i Galata’da Veleci tâifesinden Loza v. Gül nâm zimmî mahfil-i kazâda bâ‘is-i hâze’s-sifr dimici tâifesinden Tomako v. Lefter nâm zimmî muvâcehesinde üzerine da‘vâ ve takrîr-i kelâm edip bundan akdem mezbûr Tomako yedine kendi malımdan on kıt‘a riyâlî kebîr guruş-ı kebîr îdâ‘ ve teslîm edip ol dahi vech-i muharrer üzre istîdâ‘ ve kabz eylemişidi hâlâ meblağ-ı mezbûr on kıt‘a riyâlî guruş mezbûrun yedinde kalmışidi. Merkūm Tomako’dan taleb ederim, suâl olunsun dedikde gıbbe’s-suâl ve akībe’l-inkâr müdde‘î-i mezbûr Loza’dan müdde‘âsını mübeyyine beyyine taleb olundukda ikāmet-i beyyineden izhâr-ı aczile istihlâf etmeğin müdde‘î-i mezbûrun yedinde vech-i merkūm üzre on kıt‘a riyâlî guruş ahz ü kabz ve yedinde kalmadığına mezbûr Tomako’ya yemîn teklîf olundukda ol dahi [alâ] vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeğin mûcebiyle müdde‘î-i mezbûr Loza bilâ-beyyine mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Eyüb Ağa el-Bevvâbü’s-sultânî, fahrü’l-kuzât Abdülkerim Efendi b. Mehmed Efendi, Mustafa Çelebi b. Receb, Mehmed b. Abdullah, Ahmed Yazıcı b. Mehmed ve gayruhüm.