Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 311 Hüküm no: 389 Orijinal metin no: [57b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitraki’ye hizmet ederken ölen Nikite’nin ücretinden kalan borç davasında sulh sağlandığı Fi’l-asl vilâyet-i Anadolu’da Mizistre [Mestre?] kazâsına tâbi‘ Zeriçe nâm karye sâkinlerinden olup bundan akdem mahmiye-i Galata müzâfâtından Kapıdağı nâhiyesine tâbi‘ Mihanya nâm karyede sâkin hâlik olan Nikite nâm zimmînin verâseti li ebeveyn ammi oğlu Kalino nâm zimmîye münhasıra olduğu nakl-i şer‘î ile zâhir ve sâbit oldukdan sonra mezbûr Kalino mahfil-i kazâda zikr olunan Mihanya nâm karyede sâkin iken bundan esbak hâlik olan Dimitraki nâm zimmînin sulbî kebîr oğlu olup kendi tarafından asîl ve karındaşları Polihroni ve Loza nâm zimmîler ile vâlidesi Sago nâm nasrâniye taraflarından husûs-ı âti’l-beyâna vekîl olup bimâ hüve nehcü’s-sübût şer‘an vekâleti sâbite olan bâ‘is-i hâze’s-sifr Praşko nâm zimmî muvâcehesinde ikrâr ve takrîr-i kelâm edip bundan akdem babanız hâlik-i mezbûr Dimitraki kendiye hizmet etmek üzre ammim hâlik-i mezbûr Nikite’nin nefsini senede ikişer bin akçe ücret ile istîcâr ve kabûl edip mûrisimiz hâlik-i mezbûr Nikite dahi ber vech-i muharrer ba‘de’l-îcâr merkūm Dimitraki’ye on sene hizmet edip müddet-i mezbûrede müctemi‘ olan yirmi bin akçe ücretini kable’l-ahz hâlik olmağla meblağ-ı mezbûru merkūmûndan da‘vâ ve taleb eylediğimde beynimizde münâza‘ât-ı kesîre vâkı‘a olmuşidi el-hâletü hâzihî vesâtat-ı muslihîn ile da‘vâ-yı mezbûrumdan beni yetmiş kıt‘a riyâlî kebîr guruş üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr yetmiş kıt‘a riyâlî guruşu mezbûrûn yedlerinden tamâmen ahz ü kabz edip mâ‘adâ da‘vâsından mezbûrların zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d meblağ-ı mezbûra müte‘allika vechen mine’l-vücûh mezbûrûn ile da‘vâ ve husûmetim yokdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Ebûbekir Beşe b. Şaban Çukadâr, Abdülkerim Çelebi b. Mehmed, el-Hâc Ramazan b. ( ), Ahmed Çelebi b. Mehmed, Abdullah Çelebi b. Mehmed, Mustafa Çelebi b. Receb.