Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 312 Hüküm no: 390 Orijinal metin no: [57b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Ağik’in kefaletden dolayı Nikola v. Andon’da olan alacağının ödenmesi hususunda tenbihte bulunulduğu Demirci tâifesinden işbu hâmilü’s-sifr Nikola v. Ağik nâm zimmî mahfil-i kazâda diğer Nikola v. Andon nâm zimmî muvâcehesinde üzerine da‘vâ ve takrîr-i kelâm edip bundan akdem gāib ani’l-meclis Yorgi nâm zimmî zimmetinde cihet-i deyn-i şer‘îden beş bin yüz elli akçe hakkım olup gāib-i merkūmdan mukaddemâ da‘vâ ve taleb eylediğimde meblağ-ı mezbûra merkūm Nikola tarafından emr ve kabûlü hâvî kefâlet-i sahîha-i şer‘iyye ile kefîl olmuşidi el-hâletü hâzihî meblağ-ı merkūmun iki bin beş yüz kırk akçesini kefîl-i merkūm Nikola yedinden ahz ü kabz edip [58a] meblağ-ı bâkī iki bin altı yüz on akçesini dahi merkūmdan kefâleti hasebiyle taleb ederim, suâl olunsun dedikde gıbbe’s-suâl mezbûr Nikola cevâbında fi’l-vâki‘ müdde‘î-i merkūmun gāib-i mezbûr zimmetinde cihet-i merkūmdan ancak beş bin akçe hakkı olup meblağ-ı mezbûrun cümlesine ben emr ve kabûlü hâvî kefâlet ile kefîl olmuşumdur deyû ikrâr ve yüz elli akçe ziyâdeye kefâletini inkâr edicek müdde‘î-i mezbûrdan ziyâdeye kefâletini mübeyyine beyyine taleb olundukda ityân-ı beyyine için istimhâl olunup mehil-i şer‘î ile imhâl olundukdan sonra müdde‘î-i merkūmun kabzına i‘tirâf eylediği meblağdan bâkī iki bin dört yüz altmış akçenin edâsıyla kefîl-i merkūm Nikola ilzâm olunup mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Ahmed Yazıcı b. Mehmed, Hüseyin b. Mirza, Mehmed b. Receb, Mustafa Çelebi b. Receb ve gayruhüm.