Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 318 Hüküm no: 400 Orijinal metin no: [59b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Hacı Receb’in evini kardeşi Ümmühâni’ye sattığı Mahmiye-i Galata dâhilinde Yolcuzâde mahallesinde sâkine Hatice bt. el-Hâc Receb nâm Hâtun tarafından bey‘-i âti’z-zikri ikrâra vekîl olup zât-ı mezbûreyi ma‘rifet-i şer‘iyye ile ârifân olan Mustafa Çelebi b. Ali Dede ve Mustafa b. Bâli Reis nâm kimesneler şehâdetleri ile şer‘an vekâleti sâbite olan mahalle-i mezbûre imâmı Musa Efendi b. el-Hâc Mehmed mahfil-i kazâda müvekkile-i mezbûrenin karındaşı râfi‘atü hâze’l-kitâb Ümmühâni Hâtun bt. el-Hâc Receb mahzarında bi’l-vekâle ikrâr ve takrîr-i kelâm edip müvekkilem mezbûre Hatice Hâtun’un silk-i mülk-i sahîhinde münselik olup mahalle-i mezbûrede vâki‘ bir tarafdan yine müvekkilemin âhar mülkü ve bir tarafdan Medîne-i münevvere vakfı’ndan olup el-Hâczâde tasarrufunda olan vakıf menzil ve iki tarafdan tarîk-i hâs ile mahdûd fevkānî bir bâb oda ve bir kenîfi müştemil olan mülk menzilini târih-i kitâbdan üç sene mukaddem mezbûre Ümmühâni Hâtun’a yedi bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı merkūmu mezbûre Ümmühâni yedinden bi’t-tamâm ahz ü kabz etmekle menzil-i mahdûd-ı mezkûr merkūme Ümmühâni’nin mülk-i müşterâsıdır, keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Mefharü’l-kuzât Nasuh Efendi, Abdülkerim [b.] Mehmed Efendi el-Kâtib, Ebûbekir Beşe b. Şaban Çukadâr, Ahmed Yazıcı b. Mehmed, Ahmed Çelebi b. Mustafa.