Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 318 Hüküm no: 401 Orijinal metin no: [60a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kostantin v. Yorgi’nin Lefter v. Dimitri’ye kötü söz söylemediğinin anlaşıldığı Mahmiye-i Galata hâricinde Kalafatyeri’nde sâkin hayyât tâifesinden işbu râfi‘ü’s-sifr Lefter v. Dimitri nâm zimmî mahfil-i kazâda Kostantin v. Yorgi nâm zimmî mahzarında üzerine da‘vâ ve takrîr-i kelâm edip târih-i kitâbdan bir gün mukaddem mezbûr Kostantin Kalafatyeri nâm mevzi‘de bi gayr-ı vech-i şer‘î hîz deyû şetm eyledi, suâl olunup mûceb-i şer‘îsi [icrâ] olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı aczile istihlâf etmeğin fi’l-vâki‘ târih-i mezkûrda mevzi‘-i mezbûrda müdde‘î-i mezbûr Lefter’e ber vech-i muharrer hîz deyû şetm etmediğine merkūm Kostantin’e yemîn teklîf olundukda ol dahi yemînden nükûl etmeğin mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Ramazan Çelebi b. Mehmed, Emrullah b. Mehmed, Süleyman Çelebi, Mustafa Çelebi b. Receb ve gayruhüm.