Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 319 Hüküm no: 402 Orijinal metin no: [60a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Demirhan bt. Abdullah’ın vefat eden eski sahibi Sâime bt. Abdullah’ın kendisine bağışladığı eşyaları beytülmâl emininden teslim aldığı Mahmiye-i Galata müzâfâtından kasaba-i Tophâne’de Hoca Ali mahallesinde sâkine Demirhan bt. Abdullah nâm hâtun mahfil-i kazâda mahmiye-i mezbûrede bi’l-fi‘l beytülmâl emîni olan Siyavuş Ağa’nın sâbitü’l-vekâle vekîli olan Hasan Ağa b. Abdurrahman mahzarında ikrâr ve takrîr-i kelâm edip ben mahalle-i mezbûrede sâkine iken bundan akdem müteveffât olan Sâime bt. Abdullah’ın câriye-i memlûkesi olup târih-i kitâbdan iki ay mukaddem seyyidem mezbûre Sâime kemâl-i sıhhatde iken malından beni tahrîr ve i‘tâk ve zümre-i harâir-i asliyyâta idrâc [ve] ilhâk eyledikden sonra silk-i mülkünde münselik olan eşyâsından iki beledî yorgan ve iki minder kılıfı ve iki yastık, bir köhne orta keçesi, iki döşek, bir çarşaf ve bir tepsi ve bir köhne yan keçesi, iki tencere ve üç sahan bana hibe-i sahîha-i şer‘iyye ile hibe ve teslîm ben dahi meclis-i hibede ittihâb [ve] kabz ve tesellüm eylediğimden sonra mezbûre Sâime bilâ-vâris fevt olmağla eşyâ-i mezkûreyi müteveffât-ı mezbûrenin muhallefâtı olmak üzre emîn-i merkūm kabz eyledikde ben dahi vech-i muharrer üzre hibe-i mezbûreyi vekîl-i mezbûr muvâcehesinde isbât etmekle kabz eylediği eşyâyı mezbûreyi emîn-i merkūm yedinden bi’t-tamâm ve’l-kemâl ahz ü kabz eyledim min ba‘d eşyâ-i muharrereden emîn-i merkūmun yedinde bir nesne kalmamışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Eyüb Ağa b. Ahmed el-Bevvâb, Ebûbekir Beşe b. Şaban Çukadâr, Mustafa Çelebi b. Receb, Ahmed Yazıcı b. Mehmed ve gayruhüm.