Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 320 Hüküm no: 403 Orijinal metin no: [60a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Memi’nin kardeşi Ahmed Çelebi aleyhindeki arsa ve ev davasından vazgeçtiği Mahrûsa-i Galata hâricinde vâki‘ Sarı Lütfi mahallesinde sâkin Ali Çelebi b. Memi nâm kimesne meclis-i şer‘-i hatîr-i lâzımü’t-tevkīrde li ebeveyn karındaşı sâhib-i hâze’l-kitâb Ahmed Çelebi nâm kimesne mahzarında ikrâr ve takrîr-i kelâm edip mahalle-i merkūmede vâki‘ bir tarafdan ba‘zan Mustafa Ağa ve ba‘zan Hasan Reis veresesi mülkleri ve bir tarafdan mekābir-i müslimîn ve bir tarafdan ba‘zan haffâf Mehmed Çelebi’ye meşrûta olan vakıf menzil ve ba‘zan tarîk-i hâs ve bir tarafdan ba‘zan el-Hâc Yusuf ve ba‘zan mezbûr Ali Çelebi mülkleri ile mahdûd ve müştemil menzil vâlidemiz olup bundan akdem vefât eden Belkıs bt. Bâli nâm hâtunun ilâ zamânı vefâtihâ mülkü olup ba‘de vefâtihâ menzil-i mahdûd-ı merkūm irs-i şer‘le bize intikāl etmekle beynimizde ale’l-iştirâk iktisâm edip alâmât-ı fâsıla vaz‘ eylediğimizden sonra zikr olunan menzilin garb tarafında vâki‘ tûlen dokuz zirâ‘ ve arzan beş parmak arsayı ve yine menzil-i mezbûrun kıble tarafında vâki‘ tûlen on bir ve arzan nısf zirâ‘ müşterek bi’r-i mâya muttasıl damlalık arsasını ve yine münâza‘un fîh olan mekābir-i müslimîn tarafında vâki‘ menzilime muttasıl fevkānî odasının ocağı ve damlalığını karındaşım mezbûr Ahmed Çelebi’den mukaddemâ da‘vâ ve taleb eylediğimde beynimizde münâza‘ât-ı kesîre vâkı‘a olmuşidi el-hâletü hâzihî da‘vâ-yı mezkûrumdan fâriğ olup zikirleri mürûr eden arsalar ile zikr olunan fevkānî odanın ocağı ve damlalığına müte‘allika da‘vâdan mezbûr Ahmed Çelebi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sânî min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa Efendi b. Receb el-İmâm, Mahmud Çelebi b. Mahmud el-Müezzin, Hasan Dede b. Abdullah, Sâlih Çelebi b. Mehmed, Mustafa Çelebi b. Mirza, Hüseyin Beşe b. Mehmed, el-Hâc Ali b. Mehmed, el-Hâc Yusuf b. Abdullah, Nasuh Beşe b. Abdullah, el-Hâc Bayram b. Abdullah, Mustafa b. Receb, Mehmed Çelebi b. Abdullah, Hüseyin Dede b. Abdullah, (...)