Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 320 Hüküm no: 404 Orijinal metin no: [60b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Ahmed’in vefat eden eşi Mehmed’in zimmetinde olan mehrini beytülmâl emininden tahsil ettiği Mahmiye-i Galata dâhilinde Câmi‘-i Kebîr mahallesinde sâkin iken bundan akdem fevt olan Mehmed b. Abdullah’ın verâseti zevce-i metrûkesi Âişe bt. Ahmed nâm hâtuna münhasıra olduğu şer‘an zâhir ve müte‘ayyin oldukdan sonra bâ‘is-i hâze’l-vesîka mezbûre Âişe mahfil-i kazâda mahmiye-i mezbûrede bi’l-fi‘l beytülmâl emîni olan umdetü’l-a‘yân Siyavuş Ağa b. Abdullah’ın husûs-ı âti’l-beyâna vekîl-i müsecceli olan Hasan Ağa b. Abdurrahman mahzarında üzerine da‘vâ ve takrîr-i kelâm edip zevcim müteveffâ-yı mezbûr Mehmed’in zimmetinde mütekarrir ve ma‘kūdun aleyh olan mehr-i müeccelimden elli kıt‘a riyâlî guruş hakkım olmağla meblağ-ı mezbûru müteveffâ-yı merkūmun muhallefâtına vâzı‘ü’l-yed olan emîn-i müşârün-ileyhden taleb ederim, suâl olunup alıverilmesi murâdımdır dedikde gıbbe’s-suâl ve akībe’l-inkâr müdde‘iye-i mezbûreden müdde‘âsını mübeyyine beyyine taleb olundukda udûl-i ricâlden olup mahalle-i merkūme sâkinlerinden el-Hâc Ali b. Abdullah ve Ramazan b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı merkūm hâl-i hayâtında ve kemâl-i akl ve sıhhatinde zevcesi mezbûrenin mihr-i müeccelinden zimmetinde elli kıt‘a merkūmü’l-vasf guruş vâcibü’l-edâ deyni olduğunu bizim huzûrumuzda ikrâr ve bizi işhâd eyledi. Biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra meblağ-ı mezbûrdan küllen ve ba‘zan ahz ve istîfâ ve hibe ve turuk-ı şer‘iyyeden bir vechile zevci müteveffânın zimmetini ibrâ ve iskāt etmediğine mezbûre Âişe’ye yemîn teklîf olundukda ol dahi alâ hasebi’l-mes’ûl yemîn billâhi’l-aliyyi’l-a‘lâ etmeğin mûcebiyle meblağ-ı mezbûru müdde‘iye-i merkūmeye edâ ve teslîme emîn-i mûmâ-ileyhe tenbîh birle mâ vaka‘a bi’t-taleb ketb olundu. 7 Zilhicceti’ş-şerîfe sene 1073 Şuhûdü’l-hâl: Mustafa b. Receb, Hüseyin b. Mirza, Ali b. Mustafa, Emrullah b. Mehmed.