Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 724 Hüküm no: 936 Orijinal metin no: [111b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bostancılar kethüdası el-Hâc Ahmed Ağa b. Hüdâverdi’nin vârissiz ölen bostancı el-Hâc Mahmud’a borcu olan el-Hâc Hüseyin Bey’e açtığı davada davalıya mühlet verildiği Hadîka-i hâssa bostancılarının kethüdâları olup tavâif-i mezbûreden bilâ-vâris fevt olanların beytülmâllerini ve terekelerini ahz u kabza memûr olan umdetü’l-emâcid ve’l-ekârim câmi‘ü’l-mehâmid ve’l-mekârim el-Hâc Ahmed Ağa b. Hüdâverdi tarafından husûs-ı âti’l-beyâna vekîl olup es-Seyyid Süleyman Çelebi b. Ali ve Mehmed Bey b. Hüseyin nâm kimesneler şehâdetleri ile şer‘an vekâleti sâbite olan el-Hâc Hasan Bey b. Hüseyin nâm kimesne meclis-i şer‘-i hatîr-i lâzımü’t-tevkīrde el-Hâc Hüseyin Bey b. el-Hâc İbrahim nâm kimesne mahzarında bi’l-vekâle üzerine da‘vâ ve takrîr-i kelâm edip bundan akdem Hadîka-i hâssa’da bostancı iken bilâ-vâris vefât eden el-Hâc Mahmud b. ( ) nâm kimesnenin merkūm el-Hâc Hüseyin Bey zimmetinde cihet-i karz-ı şer‘îden kırk üç bin akçe hakkı olup meblağ-ı mezbûrun yirmi üç bin dört yüz akçesini hayâtında merkūm el-Hâc Hüseyin Bey yedinden ahz u kabz edip bâkī on dokuz bin altı yüz akçesi zimmetinde kalmağla hâlâ meblağ-ı bâkī-i mezbûru vekâletim hasebiyle merkūm el-Hâc Hüseyin Bey’den taleb ederim suâl olunsun dedikde gıbbe’s-suâl merkūm el-Hâc Hüseyin Bey cevâbında müteveffâ-yı mezbûra cihet-i mezbûreden deynim olan kırk üç bin akçeden müdde‘î-i mezbûrun edâsını i‘tirâf ettiği yirmi üç bin dört yüz akçeyi ve bâkī on dokuz bin altı yüz akçeyi tamâmen müteveffâ-yı mezbûra hayâtında edâ ve teslîm edip ol dahi ahz ve istîfâ etmişidi deyû def‘le mukābele edicek gıbbe’l-istintâk ve’l-inkâr merkūm el-Hâc Hüseyin Bey’den def‘-i mezbûrunu mübeyyine beyyine taleb olundukda udûl-i ricâl-i müslimînden olup hadîka-i mezbûre bostancılarından Şahin b. Abdullah ve Siyavuş b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ merkūm el-Hâc Hüseyin Bey müteveffâ-yı mezbûra hayâtında cihet-i karz-ı şer‘îden deyni olan kırk üç bin akçenin yirmi üç bin dört yüz akçesini bir def‘a ve on üç bin akçesini dahi bir def‘a edâ ve teslîm edip müteveffâ-yı mezbûr dahi merkūm Hacı Hüseyin yedinden ahz [ve] istîfâ etmişdir biz bu husûsa bu vech üzre şâhidleriz şehâdet dahi ederiz [deyû] her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle oldukdan sonra merkūm Hacı Hüseyin’den mâ‘adâ altı bin altı yüz akçeyi dahi edâsına beyyine taleb olundukda ityân-ı beyyine için istimhâl etmeğin mehl-i şer‘î ile imhâl olunup mâ vaka‘a bi’t-taleb ketb olundu. Fi’l-vevmi’t-tâsi‘ aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Baba Resul b. Rıdvan, Veli b. Mahmud, Mehmed b. Ramazan, Hüseyin Çelebi b. Ahmed.