Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 327 Hüküm no: 414 Orijinal metin no: [62a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Mehmed’in terekesinden mirasçısı Havva Hanım’a isabet eden hissenin beytülmâl emininde olduğu Mahrûsa-i Galata hâricinde vâki‘ Şahkulu mahallesinde sâkin iken bundan akdem vefât eden Mehmed nâm kimesnenin vasiyy-i muhtârı olduğu lede’[ş-şer‘i’]l-mutahhar sâbit ve mütehakkik olan işbu râfi‘ü’l-vesîka İbrahim b. Ahmed mahfil-i kazâda mahrûsa-i mezbûrede bi’l-fi‘l voyvoda ve beytülmâl-i âmme emîni olup tereke-i müteveffâ-yı mezbûra vâzı‘ü’l-yed olan fahrü’l-akrân Siyavuş Ağa’nın kethüdâsı ve tarafından sâbitü’l-vekâle vekîli olan İsmail Bey mahzarında üzerine da‘vâ ve takrîr-i kelâm edip müteveffâ-yı mezbûrun cümle terekesini emîn-i mûmâ-ileyh ahz ü kabz etmekle tenfîz-i vesâyâsı için emîn-i müşârün-ileyh yedinden ber mûceb-i defter-i kassâm yedi bin akçe ahz ü kabz edip müteveffâ-yı mezbûrun karındaşı kızı olup cezîre-i Midilli’de vâki‘ Molova kazâsına tâbi‘ İskamya nâm karyede sâkine Havva nâm hâtunun hisse-i şer‘iyyesi olan beş bin altı yüz akçe emîn-i mûmâ-ileyh yedinde kalmışdır, vekîl-i mezbûrdan suâl olunup takrîr tahrîr ve yedime hüccet-i şer‘iyye verilmesi matlûbumdur dedikde gıbbe’s-suâl vekîl-i mezbûr İsmail Bey cevâbında fi’l-vâki‘ vasiyy-i mezbûrun vech-i muharrer üzre kabz eylediği yedi bin akçeden mâ‘adâ mezbûre Havva’nın hisse-i şer‘iyyesi olan beş bin altı yüz akçe emîn-i merkūm yedinde kalmışdır deyû ikrâr ve i‘tirâf etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa Çelebi b. Receb, Hamza b. Abdülganî, Ahmed Yazıcı b. Mehmed, Hüseyin b. Abdullah.