Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 327 Hüküm no: 415 Orijinal metin no: [62a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Foti Reis’in gemisindeki mürettebatın kiremit satışından elde edilen parayı paylaştıkları Gemici tâifesinden Mustafa b. Ebûbekir ve Mehmed b. Bayram nâm müslimler ile Yorgi v. Kominoz ve Manol v. Kombinoz ve Marko v. Andoni ve Yani v. Mihal nâm zimmîler mahfil-i kazâda işbu râfi‘ü’l-kitâb Foti Reis v. İspitol zimmî muvâcehesinde üzerine da‘vâ [ve] takrîr-i kelâm edip biz reis-i mezbûrun sefînesinde yoldaşlar olup Hora nâm karye iskelesine sefer edip iskele-i merkūmede reis-i mezbûrun iştirâ eylediği kiremitini sefînesine tahmîl eyleyip İstanbul’a geldiğimizden sonra reis-i mezbûr sâlifü’z-zikr [kire]midini bey‘ eyledikde hâsıl olan semeninden sermâye ve kumanya ve sâir mesârif-i lâzıme ihrâc olundukdan sonra bâkī kalan iki bin elli akçe fâide on dokuz paya taksîm olundukda her bir paya yüz on dokuzar akçe isâbet etmekle her birimiz payımıza isâbet eden yüz on dokuzar akçeyi reis-i mezbûrun yedinden bi’t-tamâm ve’l-kemâl ahz ü kabz eyledik min ba‘d Hora seferinden reis-i mezbûrun yedinde bir akçe ve bir habbe hakkımız bâkī kalmamışdır dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa Çelebi b. Receb, Emrullah b. Mehmed, Âbid b. Mustafa, Hüseyin b. Mirza, Muharrem b. Receb ve gayruhüm.