Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 328 Hüküm no: 416 Orijinal metin no: [62a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mühtedi Mehmed’in Kanilo v. Yani ve sairleri aleyhindeki darb, hapis ve alacak davasının reddi Mahmiye-i Galata müzâfâtından Arnavudköy demekle ma‘rûf karye sâkinlerinden Mehmed b. Abdullah nâm mühtedî meclis-i şer‘-i hatîr-i lâzımü’t-tevkīrde karye-i mezbûre sükkânından işbu râfi‘ü’s-sifr Kanilo v. Yani ve Milo v. Dimitri ve Yorgi v. Valki ve Yorgi v. Yani ve Nikola v. Kosta ve Yani v. Mihal nâm zimmîler muvâcehelerinde üzerine da‘vâ ve takrîrli kelâm edip ben şeref-i İslâm ile müşerref olmazdan bir buçuk sene mukaddem mezbûrûn karye-i mezbûrede beni bi gayr-ı vech-i şer‘î beni ahz ve haps eylediklerinden mâ‘adâ kendi malımdan otuz bin akçemi ahz [u] kabz eylediler, suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı aczile istihlâf etmeğin târih-i mezbûrda müdde‘î-i mezbûr Mehmed’i bi gayr-ı vech-i şer‘î ahz [u] haps edip otuz bin akçesini ahz ü kabz eylemediklerine mezbûrûna yemîn teklîf olundukda her biri alâ vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- eylediklerinde müdde‘î-i mezbûr Mehmed bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’s-sâdis min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa Çelebi el-Bostanî, el-Hâc Ramazan b. Mahmud, Abdülkādir b. Mehmed, Mustafa Çelebi b. Receb, Muharrem el-Muhzır ve gayruhüm.