Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 328 Hüküm no: 417 Orijinal metin no: [62a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiko v. Nikola bozahâne gediği hissesi ile aletlerini Ali Beşe b. Mustafa’ya sattığı Bozacı tâifesinden Kiko v. Nikola nâm zimmî meclis-i şer‘-i hatîr-i lâzımü’t-tevkīrde yine tâife-i mezbûreden râfi‘-i hâze’l-kitâb Ali Beşe b. Mustafa nâm kimesne mahzarında üzerine da‘vâ ve takrîr-i kelâm edip mahmiye-i Galata’da Azebkapısı hâricinde vâki‘ bozahânede gedik ta‘bîr olunur dört sehim i‘tibâr olunup sihâm-ı mezbûreden rub‘ hisse benim olup selâse-i erbâ‘ı âharın olmağla benim olan rub‘ hissemin iki kazgan ve iki tâbe ve yüz elli dö[rt] kebab şişi ve kırk aded kova ve sâir âlât-ı lâzımesiyle mezbûr Ali Beşe’ye fıddî râyic fi’l-vakt altı bin dört yüz akçeye bey‘ ve teslîm edip ol dahi vech-i muharrer üzre [62b] iştirâ ve tesellüm [ve] kabz ve kabûl eyledikden sonra semeni olan meblağ-ı mezbûr altı bin dört yüz akçeyi mezbûr Ali Beşe’nin yedinden bi’t-tamâm alıp kabz eyledim ba‘de’l-yevm zikr olunan rub‘ hissem cümle âlât-ı lâzımesiyle mezbûr Ali Beşe’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Hasan Beşe b. Mehmed, Ali Beşe b. Kasım, Ömer Beşe b. Mehmed, Mustafa b. Abdullah, Hasan b. İsmail ve gayruhüm.