Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 329 Hüküm no: 418 Orijinal metin no: [62b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola, Dimitri ve Kasandra kardeşler babalarından intikal eden üzüm bahçesi ile ağaçlardaki hisselerini Panayot v. Yani’ye sattıkları Vilâyet-i Anadolu’da Sürmene kazâsına tâbi‘ Manahor nâm karye sükkânından iken bundan akdem hâlik olan Yorgi v. ( ) nâm zimmînin verâseti sulbî kebîr oğulları Nikola ve Dimitri nâm zimmîler ile sulbiye kebîre kızı Kasandra nâm nasrâniyeye münhasıra olduğu şer‘an zâhir oldukdan sonra mezbûr Nikola kendi tarafından asâleten ve merkūman Kasandra ve Dimitri taraflarından bey‘-i âti’l-beyâna vekîl olup hasm-ı şer‘î-i câhid mahzarında mezbûreyi ma‘rifet-i şer‘iyye ile ârifân olan Polihrona v. Lefter ve Yorgi v. Angeli nâm zimmîler şehâdetleri ile şer‘an vekâleti sâbite olmağla vekâleten meclis-i şer‘-i hatîr-i lâzımü’t-tevkīrde işbu râfi’u’s-sifr Panayot v. Yani nâm zimmî muvâcehesinde ikrâr ve takrîr-i kelâm edip karye-i mezbûrede vâki‘ bir tarafdan Sava nâm zimmî mülkü ve bir tarafdan bağ ve bir tarafdan el-Hâc Mehmed Ali mülkü ve bir tarafdan ba‘zan Zanado mülkü ve ba‘zan derbend ile mahdûd eşcâr-ı müsmireyi müştemil mülk üzüm bahçesinin nısf-ı şâyi‘i Arab nâm kimesnenin mülkü olup ve nısf-ı şâyi‘-i âharı dahi babamız hâlik-i mezbûrdan bana ve müvekkilân-ı merkūmâna irs-i şer‘le intikāl edip mülkümüz olmağın hâlâ bahçe-i mezkûreden vech-i muharrer üzre nısf-ı şâyi‘-i merkūmu asâlet ve vekâletim hasebiyle merkūm Panayot’a sekiz yüz akçe tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk edip ol dahi vech-i muharrer üzre iştirâ ve tesellüm eyledikden sonra semeni olan meblağ-ı mezbûr sekiz yüz akçeyi yedinden tamâmen alıp kabz edip bahçe-i mahdûde-i mezkûreden mülkümüz olan nısf-ı şâyi‘-i merkūmu mahallinde kabz [ve] tasarrufa mezbûr Panayot’u taslît eyledim, keyfe mâ yeşâ’ ve yahtâr mutasarrıf olsun dedikde mâ vaka‘a bi’t-taleb ketb olundu. Fi’l-yevmi’s-sâmin min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Hüseyin b. Abdullah, Hamza b. Abdullah, Ahmed Çelebi b. İbrahim, Mahmud Reis b. İsa, Hüseyin Reis b. İsa, Süleyman b. Resul ve gayruhüm.