Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 330 Hüküm no: 419 Orijinal metin no: [62b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Nikite’nin, Nikola’da olan alacağının varislerince tahsil olunduğu Fi’l-asl vilâyet-i Rumeli’nde Patnoz adasından olup bundan akdem hâlik olan Nikite nâm zimmînin verâseti sulbî kebîr oğulları Nikola ve Yorgi’ye münhasıra olduğu şer‘an zâhir ve mütehakkik oldukdan sonra mezbûr Nikola asâleten ve er karındaşı mezbûr Yorgi tarafından bimâ hüve nehcü’s-sübût şer‘an vekâleti sâbite olmağla vekâleten meclis-i şer‘-i hatîr-i lâzımü’t-tevkīrde mahmiye-i Galata’da hayyât tâifesinden işbu râfi‘ü’l-vesîka Nikola v. Nikite nâm zimmî muvâcehesinde asâleten ve vekâleten ikrâr ve takrîr-i kelâm edip bundan esbak babam hâlik-i mezbûr Nikite hâl-i hayâtında mezbûr Nikola’ya on beş kıt‘a esedî guruş ikrâz ve teslîm, ol dahi vech-i muharrer üzre yedinden ahz ü kabz edip kable’l-ahz ve’l-istîfâ hâlik olmağla meblağ-ı mezbûru merkūm Nikola’nın zimmetinde kalmışidi el-hâletü hâzihî meblağ-ı mezbûr asâlet ve vekâletim hasebiyle mezbûrun yedinden tamâmen ahz ü kabz eyledim mezbûrun zimmetinde bir akçe ve bir habbe bâkī kalmamışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’r-râbi‘ aşer min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa Çelebi b. Receb, Emrullah b. Mustafa, Ahmed Yazıcı b. Mehmed, Mustafa Çelebi b. ( ) ve gayruhüm.