Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 330 Hüküm no: 420 Orijinal metin no: [62b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Maryata’nın menzil hissesini Kostantin’e sattığı Mahmiye-i Galata’da Sultan Bayezid mahallesinde sâkin iken bundan akdem hâlik olan Palaş v. Todori nâm zimmînin verâseti zevce-i metrûkesi Maryata ile li ebeveyn er karındaşı oğlu Foti nâm zimmîye münhasıra olduğu şer‘an zâhir ve mütehakkik oldukdan sonra mezbûre Maryata meclis-i şer‘-i hatîr-i lâzımü’t-tevkīrde işbu bâ‘is-i hâze’s-sifr Kostantin v. Eleni nâm zimmî muvâcehesinde ikrâr ve takrîr-i kelâm edip mahalle-i mebrûrede vâki‘ bir tarafdan Eline mülkü ve bir tarafdan cidâr-ı hısn ve bir tarafdan İsak yahudi mülkü ve bir tarafdan tarîk-i âm ile mahdûd bir bâb tahtânî ve bir bâb fevkānî ve mahzeni ve su kuyusunu müştemil olan mülk menzilin nısf-ı şâyi‘i benim mülk-i mahzım ve nısf-ı şâyi‘-i âharı dahi hâlik-i mezbûrun mülkü olup ba‘de helâkihî nısf hisse-i merkūmesinin [63a] dört sehimden bir sehimi bana ve üç sehimi mezbûr Foti’ye intikāl ve isâbet etmekle hâlâ menzil-i mezbûrdan mülküm olan nısf-ı şâyi‘-i merkūm ile rub‘ hisse-i mezbûremi bi safkatin vâhidetin mezbûr Kostantin’e fıddî ve râyic fi’l-vakt yirmi altı bin iki yüz elli akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ [ve] teslîm edip ol dahi vech-i muharrer üzre iştirâ ve kabûl ettikden sonra semeni olan meblağ-ı mezbûr yirmi altı bin iki yüz elli akçeyi mezbûrun yedinden tamâmen ahz ü kabz eyledim ba‘de’l-yevm menzil-i mezbûrdan mülküm olan nısf-ı şâyi‘-i merkūmem ile rub‘ hisse-i mevrûsum mezbûrun mülk-i müşterâsıdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’r-râbi‘ aşer min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mehmed Çelebi b. Abdullah, Hüseyin Çelebi b. Mirza, Himmet Beşe b. Ali, Mustafa Çelebi b. Receb ve gayruhüm.