Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 725 Hüküm no: 937 Orijinal metin no: [112a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mumcu taifesinden bazılarına iş yaptırmayan mumcu yiğitbaşısı Toroş v. Anton’un uyarıldığı Mahmiye-i İstanbul’da koltukçu ta‘bîr olunur mumcu tâifesinden olan Poliro v. Kirko ve Yorgi v. Dimo ve Apostol v. Yani ve Polizo v. Ohro ve Apostol v. Şadri nâm zimmîler meclis-i şer‘-i şerîf-i lâzımü’t-tevkīrde tâife-i mezbûrenin yiğitbaşıları olan Toroş v. Anton nâm zimmî muvâcehesinde her biri takrîr-i kelâm ve ta‘bîr ani’l-merâm edip biz mahmiye-i mezbûrede Sultan Bayezid kurbunda Mustafa Ağa sarayı’nda mum işleyip narh-ı cârî üzre bey‘ edip her sene ordu ve sâir tekâlîfi hâlimize göre sâir mumcular ile ma‘an verir iken mezbûr Toroş ve sâirlerin kârımıza kesâd verirsiz deyû vech-i muharrer üzre mum işlememize mâni‘ olurlar suâl olunup vech-i muharrer üzre bize mâni‘ olmamak üzre mezbûr Toroş’a tenbîh olunmak matlûbumuzdur dediklerinde gıbbe’s-suâl mezbûr Toroş kaziyye minvâl-i muharrer üzre olduğunu ikrâr etmeğin mezbûrlara vech-i muharrer üzre mum işlemelerine mâni‘ olmamak üzre mezbûr Toroş’a tenbîh olunmağın mâ vaka‘a bi’t-taleb ketb olundu. Fi’l-yevmi’r-râbi‘ ve ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Musa Çavuş b. Abdullah, Ömer Bey b. Abdullah, Kasab Mustafa b. Mehmed, Mustafa b. Ali, Ali b. Kasım, Abdi Çelebi b. Hüseyin.