Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 331 Hüküm no: 422 Orijinal metin no: [63a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Foti v. İstirati’nin ev hissesini Kostantin’e sattığı Mahmiye-i Galata’da Sultan Bayezid mahallesinde sâkin iken bundan akdem hâlik olan Palaş v. Todori nâm zimmînin verâseti zevce-i metrûkesi Maryata ile li ebeveyn er karındaşı oğlu Foti v. İstirati nâm zimmîye münhasıra olduğu şer‘an zâhir ve mütehakkik oldukdan sonra mezbûr Foti tarafından bey‘-i âti’l-beyâna vekîl olup Preşkova v. Yorgi [ve] Yamandi v. Matyona şehâdetleri ile şer‘an vekâleti sâbite olan Yorgi v. Todori nâm zimmî mahfil-i kazâda bâ‘is-i hâze’s-sifr Kostantin v. Eleni nâm zimmî muvâcehesinde bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafdan Eline mülkü ve bir tarafdan cidâr-ı hısn ve bir tarafdan İsak nâm yahudi mülkü ve bir tarafdan tarîk-i âm ile mahdûd bir bâb tahtânî ve bir bâb fevkānî mahzeni ve su kuyusunu ve kenîfi müştemil olan mülk menzilin nısf-ı şâyi‘i hâlik-i mezbûrun ile’l-helâk mülkü olup ba‘de helâkihî nısf menzil-i mezbûrun dört sehiminden bir sehmi mezbûre Maryata ve üç sehmi müvekkil-i mezbûr Foti’ye intikāl ve isâbet etmekle hâlâ sihâm-ı mezbûreden müvekkil-i mezbûrun hissesine isâbet eden üç sehim hisse-i mezkûresini vekâletim hasebiyle mezbûr Kostantin’e fıddî ve râyic fi’l-vakt on beş bin yedi yüz elli akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ettikden sonra semeni olan meblağ-ı mezbûr on beş bin yedi yüz elli akçeyi bi’t-tamâm ahz ü kabz eyledim ba‘de’l-yevm nısf menzil-i mezbûrdan müvekkil-i mezbûra isâbet eden üç sehim hisse-i irsiyyesi mezbûrun mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa Çelebi b. Receb, Emrullah b. Mustafa, Muharrem b. Mehmed, Âbid b. Mustafa, Hüseyin b. Abdullah ve gayruhüm.